Danville se liggiehuis nie weer dié Kersfees verlig

Danville se liggiehuis (Foto: Verskaf)

Vir die eerste keer in 26 jaar sal Danville se liggiehuis in Pretoria-Wes nié oor Kerstyd met duisende Kersliggies verlig word nie.

Brenda van der Merwe en haar dogter Jacomien, wat die liggiehuis-projek 26 jaar gelede van stapel gestuur het, het besluit om vanjaar eerder bejaardes se lewe te verlig met kospakkies.

Dié besluit volg ná ’n paar voorvalle wat verlede jaar plaasgevind het. Brenda en Jacomien voel dus dat hulle nie meer lede van die publiek se lewe in gevaar wil stel nie. “Omrede behoeftige gesinne en lede van die publiek jaarliks ’n draai by die liggiehuis gemaak het om na die liggies te kyk, voel ek dit raak gevaarliker om snags rond te ry,” sê Jacomien.

Die liggiehuis was al die jare veel meer as ’n mooi verskynsel tydens die feestyd in die Danville-omgewing. Die projek het ten doel gehad om duisende kospakkies aan behoeftige gesinne te gee. Die Van der Merwes het ook in Desembermaand geskenkpakkies vir behoeftige kinders uitgedeel en kospakkies by bejaardes afgelaai.

Hoewel die liggies ’n doel gedien het om die publiek te lok, sê Jacomien hul groter doel is uiteindelik om mense van kos te voorsien. “Ons wil eerder meer kruideniersware onder behoeftiges in die omgewing versprei as om nog stringe liggies te koop,” sê Jacomien.

Danville se liggiehuis beoog om vandeesjaar bejaardes te help (Foto: Verskaf)

Jacomien en Brenda wil vandeesjaar hul fokus verskuif deur bejaardes, onder andere dié by die Danville-aftreeoord, te help deur vir hulle kospakkies met Kersfees te gee. Hulle beoog om sowat 150 bejaardes vanjaar te help.

Hulle wil ook graag vandeesjaar op bejaardes fokus omrede soveel bejaardes dikwels deur hul kinders op Kersdag vergeet word. “Die eensame bejaardes gaan mekaar bystaan tydens ’n lekker Kersete,” sê Jacomien.

Jacomien en Brenda sê hulle is baie hartseer oor die besluit, maar wil graag die publiek bedank vir die 26 jaar lange getroue ondersteuning van die projek.

Jacomien en Brenda verwelkom enige skenkings, veral produkte soos blikkieskos, sojamaalvleis, poeiermelk, sagte lekkergoed soos malvalekkers en suiglekkers. Geen kontantskenkings sal toegelaat word nie.

Skenkings kan deur die dag by hul huis te Millarstraat 134, Danville, afgelewer word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

27 Kommentare

Koos Kookwater ·

Hoe gemaak as Ek in die Noord Kaap bly en n bydrae wil maak

Anni ·

Daar word gesě dat skenkings by Millarstr 134,Danville afgelewer kan word, deur loop vd dag.

Anton Kld ·

Koos koop aanlyn by bv Pick n Pay en laat dit aflewer. Net n voorstel.

RN ·

Anni ek dink nie Koos van die Noord-Kaap gaan Pta toe ry met ‘n sakkie groceries nie. Ons weet wat in die berig staan.

Mechelle ·

Wat ‘n pragtige gebaar. Jammer oor die liggiefees, maar ek glo die behoefte onder ons bejaardes is ook baie groot. Gaan hulle beslis ondersteun.

calvin ·

BAIE dankie Jacomien en Brenda! Die liggies was voorwaar elke jaar, iets om na uit te sien. Voorspoed vorentoe, en mag julle BAIE ondersteuning kry met julle harde werk!

Helena. ·

Baie jammer, maar ek het die voorreg gehad om dit te sien en dit was absoluut pragtig. Dankie vir die jare lange fees van liggies vir die wat daarin kon deel. Bejaardes het ook n plek in die son en ek gun hulle al die liefde en aandag. Doen so voort.

Outoppie ·

Baie sterkte vir julle en ons hoop en bid jul projek sal al die oumendies help

Berdéhan Brand ·

Kan die inisiatief nie geneem word dat ñ fonds gestig word sodat bejaardes elke dag van noodsaaklikhede voorsien kan word nie en nie net Kersfees nie? Dink net, as ñ paar duisend Suid-Afrikaners net ñ R100 per jaar skenk watter verskil dit nie sal maak nie…

JJ ·

Dis hartseer om iets so anoniem met Danville te sien verlore gaan maar die besluit is te verstane. Ek stem saam dat so fonds dit moontlik is om soveel meer te doen in die omgewing. Dink nie aldag mense besef watse leemtes daar bestaan nie nie net voedsel nie maar ook maatskaplik. Ek sal so fonds ondersteun.
Kry hulle geen hulp van die Lotto nie?

@jj ·

Ek dink jy bedoel sinoniem nie anoniem nie … Anoniem is iets/iemand wat dit naamloos doen.

RESPEK ·

Respekteer julle besluit.
Goeie bedoelings en goed vir die bejaardes. Ek haal my hoed af vir julle.

charmaine ·

Die liggiehuis sal gemis word maar did verstaanbaar dat veiligheid n rol speel en om dit te verskuif na die oumense en vir hulle n bydrae te gee is voorwaar ook n goeie plan.
Ek gaan beslis my bydrae kom maak.
Sterkte!

Hans ·

Wonderlik dat baie senior burgers lewens noodsaaklike voedsel gaan kry- vertrou dat projek groot steun gaan geniet!!!!!????????????????????????????????????

Melanie ·

Ek het aangesluit by World Ventures juis vir die rede.. Ek wil so baie geld maak dat ek mense en kinders en natuurlik diere ook kan help in nood.. Dis hartverskerend as mense regtig besef hoeveel mense, klein kindertjies met honger magies gaan slaap.. Ek salueer julle en bedank jul uit my hart uit vir jul goeie dade!! Mag Jesus jul seen.

Abigail ·

Kan die liggies as dit dan nie meer gebruik gaan word nie, nie dalk verkoop/opgeveil word en diegeld aan d nuwe projek geskenk word nie

Ellen Kotzé ·

Wonderbaar!!! Baie dankie harte geeom aan die Here seën julle daar.

Shawn Boehme ·

Nou vir die eerste keer sal ek julle ondersteun, wyse besluit…..

E.K. die eerste ·

Dis so jammer, ek het hul jaarliks ondersteun. Mense dis SO maklik, koop geskenkbewys van een van die supermarkte en koerier dit. Pep het ‘n wondelrike GOEDKOOP koerierdiens wat ek deesdae gebruik en jy word heeltyd per sms op hooget gehou. Ek het ook al EFT betalings aan hulle gedoen – dis maklik en veilig. Jy kan ook mos geld deur middel van bv Checkers of so onmiddellik stuur. Jy gaan na Checkers, gee die bedrag en ek dink jy betaal maar ‘n ekstra fooi soos R10 – dis baie min en jy het ‘n kode en die gee jy deur aan Brenda of Jacomien en hulle kan onmiddellik hul geld by Checkers gaan kry hulle betaal niks ekstra nie. Daar is tonne maklike en veilige maniere om hul te help en ek hoop almal wat hier lees sal. ELKE sent tel. Jou R20 is 2 koekies seep vir ‘n oumens. Hulle doen sulke wonderlike werk en hulle is self nie skatryk nie. Ag Jacomien, ek is seker jy lees hier, skakel maar die liggies aan, dis so wonderlik al ry mense net verby. Sterkte en liefde en my bydrae SAL julle kry.

Tanya ·

‘n Voorstel: Gebruik van die liggies wat reeds gekoop is en verhelder die Danville Ouetehuis daarmee. Sodoende sal die publiek na die ouetehuis gelok word wat 2 probleme kan oplos: Eensaamheid en skenkings

Msp ·

Julle het verseker nie nodig om hartseer te wees nie, dit wat julle nou gaan doen is brilliant, nou gaan daar liggies in baie oumense se harte skyn. Baie dankie vir julle goeie besluit en werk.

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.