Dawie Roodt: Rommelstatus is beslis, maar daar is pluspunte

Argieffoto (Foto: stevepb, Pixabay)

Terwyl groot vrese tans in die ekonomie heers oor die verdere afgradering van die Suid-Afrikaanse buitelandse skuld na rommelstatus, veral omdat die ekonomie op ʼn verdere afwaartse trajek verkeer en die land se skuld tans reeds op 58% teenoor sy bruto binnelandse produk staan – Eskom se skuld nie ingesluit nie – is daar tog ʼn silwer randjie om dié donker ekonomiese wolk.

Dat Suid-Afrika binnekort afgegradeer gaan word, is beslis, sê Dawie Roodt, die hoofekonoom by die Efficient Groep.

“Maar as ʼn mens in ag neem dat Suid-Afrika se buitelandse skuld nog nie te hoog is nie en as ʼn mens die sterk plaaslike finansiële markte in ag neem, wat met enige finansiële mark in die wêreld kan kompeteer, verloor ʼn mens nie alle hoop nie,” het Roodt Maandag tydens ʼn Sakeliga‑ ekonomiese seminaar verduidelik.

Hy sê dat die plaaslike finansiële sektor uiters goed gereguleer is, dat dit likied en gesofistikeerd is. “Dit bied aantreklike opbrengste op ons staatseffektemark, wat beleggers weer na Suid-Afrika kan lok.”

Hy is van mening dat sou die land afgegradeer word, dit finansiële markte skrik op die lyf sal jaag, maar dat internasionale markspekulante baie vinnig na die mark sal terugkeer om van ʼn goedkoper rand en staatseffekte gebruik te maak. “Baie vrese is ook oor hoeveel geld die land sal verlaat wanneer ons afgegradeer word. Ek glo dat dit darem nie honderde miljarde rande sal wees, soos ekonome glo nie, maar eerder tien miljarde rande.”

dawie-roodt-begrotingsrede-2018

Dawie Roodt. (Argieffoto: Reint Dykema/AfriSake)

Hy het gespekuleer dat ʼn afgradering selfs na ʼn sterker rand sou kon lei.

Die gevaar kom egter in wanneer die ekonomie tot so ʼn punt versleg dat die likiditeit wat die finansiële markte vir beleggers bied, hulle nie hier gaan hou nie. “Die meeste van die beleggings gaan portefeulje-inkomste wees, of wat as ‘hot income’ beskryf word. Dit kan net so vinnig uitgaan as wat dit ingekom het.”

Wat verdere druk op die land se ekonomie plaas, is die feit dat die belastingbetalers se getalle kwyn, veral vanweë mense wat emigreer, terwyl die bevolking groei.

Jana van Deventer, hoof van finansiële markte by ETM Analytics, sê dat bevolkingsgroei op sigself nie ʼn negatiewe ding is nie. “In die meeste gevalle dra dit dan by tot ʼn groter belastingbetalersbasis, maar in die geval van Suid-Afrika, waar die onderwysstelsel nie voldoende is om mense op te lei en deel te maak van die ekonomie nie, is dit nie volhoubaar nie.”

Tans projekteer ekonome dat die plaaslike ekonomie met net 0,5% per jaar oor die volgende twee jaar gaan groei, terwyl die bevolking in die land met 1,6% per jaar groei.

“Ons is reeds diep in die moeilikheid en Suid-Afrika sit tans met dié mees vernietigende regering wat die land al ooit gesien het. Ons het ʼn president, maar hy is nie ʼn leier nie. Hy wil leiding neem van komitees en het dikwels planne, maar hy implementeer nie daardie planne nie,” sê Roodt.

Van Deventer het verder gesê Suid-Afrika het op ʼn punt in sy ekonomie gekom waar die regering se beleidsonsekerheid en keuses sakeondernemings in die land uit die ekonomie gestoot het. “Die gewone ou betaal ongelukkig vir die wanbestuur van die regering, met die werkloosheidsyfer wat net bly styg en beleggings wat oor ʼn afgrond gestort het.”

Om na die Reserwebank te kyk en te vra dat rentekoerse verder verlaag moet word, is ook nie die oplossing nie, sê sy.

“Die enigste oplossing om die ekonomie reg te ruk, is vir die regering om sy besteding met ten minste 15% te sny. Tans verdien regeringsamptenare tussen 40% en 120% meer as hul eweknieë in die private sektor – hulle is hoogsbetaal en werk gans te min. Dit is polities onmoontlik, maar dit kan gedoen word,” het Roodt bygevoeg.

En raad wat hy vir Suid-Afrikaners kan gee oor hoe hulle die ekonomie kan regruk? “Moet nooit enige wette oortree nie, maar betaal so min as moontlik belasting,” het Roodt tong in die kies afgesluit.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

34 Kommentare

jongste oudste gewildste
Regs!

Moenie worry nie! Die regering sal baie vinnig van daai silwer randjie ontslae raak!

Kallie

Die kern van die probleem is polities van aard. En dit gaan nie verander nie. Die ekonomie drentel agterna, maar dit is onvolhoubaar en sal afplat tot ‘n nuttelose leë wynsak. Die optimisme is lankal onder zero.

Jimmy

Ai tog, Dawie en vrinne bly steeds optimisties, al beweeg die land nou vinnig na sosialisme. Die staat se greep sal verstewig en die “gesonde” finansiële stelsel sal verder onder druk geplaas word. Intussen verloor mense in al die sektore hul werk. Die kleinhandel is reeds onder druk.

Neels

Die westelike gedeelte van die land moet afstig en hul eie pad loop, uitgesluit Kaapstad en Stellenbosch. Hulle verdien SA.

George

Ek gaan my van verander na Ferreira toe, dan kan ek my goed vat en trek.