‘De Klerk moet Nobelprys teruggee’

Moeletsi Mbeki en FW de Klerk (Foto: FW de Klerk Stigting)

Druk het Maandag toegeneem vir oudpres. FW de Klerk om sy Nobelprys vir Vrede terug te gee, ná sy uitlating dat “apartheid nie ʼn misdaad teen die mensdom was nie”.

“Dit is betreurenswaardig dat ʼn 84-jarige man, wat beweer hy het herhaaldelik die ernstige onregmatighede wat gepleeg is onder apartheid erken en opreg om verskoning gevra, nie die basiese begrip verstaan waarvoor hy jammer sê nie,” het die organisasie #NOTINMYNAMESA Maandag in ʼn verklaring gesê.

“Indien De Klerk regtig jammer is, doen ons ʼn beroep op hom om sy stellings onvoorwaardelik terug te trek, of andersins die Nobelprys vir Vrede (wat hy saam met oudpres. Nelson Mandela ontvang het) terug te gee.”

Die stigting het Saterdag in die verklaring gesê: “Die idee dat apartheid ʼn ‘misdaad teen die mensdom’ was, bly politieke propaganda deur die Sowjetunie en hul ANC/SAKP-vennote om wit Suid-Afrikaners te stigmatiseer deur hulle te vergelyk met werklike misdade teen die mensdom – wat gewoonlik algehele totalitêre onderdrukking en die slagting van miljoene mense insluit.”

Julius Malema tydens die 2020 Staatsrede (Foto: Maroela Media)

Die stigting se verklaring stel dit in teenstelling met gruweldade onder kolonialisme in ander Afrikalande. “Die Britte het tydens die Mau-Mau-opstand meer as 320 000 mense aangehou en meer as 1 000 Mau-Mau-lede is gehang. Die Franse het meer as 140 000 mense in Algerië doodgemaak in ʼn oorlog wat 700 000 lewens geëis het.”

Die stigting het reageer op Julius Malema se uitlatings tydens Donderdag se staatsrede, toe hy daarop aangedring het dat De Klerk die parlement verlaat omdat sy hande “drup van bloed” weens gebeure tydens apartheid.

Ook die Jong Kommunisteliga van Suid-Afrika (YCLSA) het Maandag sterk te velde getrek teen De Klerk se verklaring. “Die inhoud van die verklaring wys duidelik dat De Klerk nie bevoeg is om as Nobelpryswenner vir Vrede bekend te staan nie. Sy stelling druis in teen die rede waarom die Nobelprys vir Vrede aan hom toegeken is,” sê die YCLSA.

Die YCLSA wil dan sommer ook hê De Klerk moet vervolg word vir sy stelling. “Die feit dat De Klerk nie apartheid as ʼn misdaad teen die mensdom beskou nie, is ʼn duidelike aanduiding dat hy nie die gruwelike oortreding van menseregte erken wat deur dieselfde stelsel waaroor hy regeer het, gepleeg is nie. Daarom behoort die Internasionale Misdaadhof hom vir strafbare manslag en gruwelike skending van menseregte te vervolg.”

 

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

18 Kommentare

jongste oudste gewildste
Nell

…en die stert, by name Malema en die YCLSA wil nou die hond swaai. Regtig? Kry vir julle.

Nie Verbaas

Ag ANC en almal wat kla, kom oor dit. Kyk wat gebeur in Suid Afrika vandag. Moord, plunder, verkragting. Alles is opgemors. Alles is 100 maal erger as wat dit ooit was. Slagspreuke oor wittes word ooral geuiter. Niks word daaroor gese of gedoen nie. Shame, Suid Afrika is n grap.

marius

Gaan staan agter in die ry . Daar is ‘n lang tou regte Afrikaners wat dieselfde gevoelens teenoor hom het ….vir heeltemal ander redes .

Johan Venter

Ja, maar kyk hoe vergoei die mense onderaan vorige berigte die afgelope dag of twee hier op Maroela in hul kommentare oor hierdie aangeleentheid vir De Klerk en kyk hoe klap hulle vir Julius hande. Ek het nie gedink ek sou die dag beleef as die Afrikaner vir Julius handeklap nie. Die ANC ry ook nou die perd, so ook Thabo Mbeki. Ek het idee ons Afrikaners kon maar netsowel saam met Roelf by die ANC aangesluit het, dis waar ons die gemaklikste is as FW ter skrake kom, of wat praat ek … mmm?

https://maroelamedia.co.za/nuus/sa-nuus/anc-veroordeel-fw-de-klerk-stigting-se-uitlatings-oor-apartheid/
https://maroelamedia.co.za/nuus/sa-nuus/de-klerk-stigting-reageer-op-eff-aanval/

JM

Die ANC, Malema, YCLSA en almal wat oor De Klerk tekere gaan, probeer eintlik om die aandag af te lei van hul eie onvermoë, wandade en mislukkings: staatskaping, leuens, diefstal, plaasmoorde ens., selfregverdiging in die ergste graad.