De Lille verloën haar kiesers, sê VF Plus

Patricia de Lille. (Foto: Armand Hough/ANA)

Die Wes-Kaapse VF Plus glo dat Patricia de Lille, die nuwe minister van openbare werke en infrastruktuur, bruin kiesers wat vir haar in die sesde demokratiese verkiesing gestem het, uitverkoop het ter wille van ʼn pos by die ANC.

Só het Peter Marais, die VF Plus se lid van die provinsiale wetgewer, Donderdag in ʼn verklaring gesê nadat De Lille Woensdag deur pres. Cyril Ramaphosa as minister aangewys is.

Marais stel in die verklaring die vraag aan De Lille of die ANC dié aanstelling met haar onderhandel het in die tyd wat sy as leier van die Good-party aan verkiesingsveldtogte deelgeneem het.

“Indien wel, is sy ʼn verduideliking verskuldig aan elke persoon wat Good met hul stem vertrou het,” sê Marais.

Die party voer aan dat De Lille se optrede hom herinner aan die tyd waarin sy die destydse Onafhanklike Demokrate (OD) op die been gebring het nadat sy in 2003 van die Pan Africanist Congress (PAC) weggebreek het.

Die OD het kort daarna van die toneel verdwyn toe De Lille, soortgelyk aan nou, haar party opgeoffer het vir ʼn hoë pos by die DA, sê Marais.

“Kiesers wat in die pas afgelope verkiesing vir Good gestem het, het dit juis gedoen omdat hulle ʼn politieke tuiste wou hê waar bruin mense as minderheid in die besonder ʼn stem sou hê om hul belange te verdedig teen verdrukking van die meerderheid van die ANC-regering.

“De Lille het nou, net soos met die OD, net die teenoorgestelde gedoen en hierdie vertroue in haar verloën deur ʼn kabinetspos by die meerderheidsparty te aanvaar waar onteiening sonder vergoeding ook deur haar departement gedryf sal moet word en waar minderhede totaal op die agtergrond geskuif gaan word wat werkgeleenthede, taal en moedertaal-onderrig aanbetref,” lui die verklaring.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

44 Kommentare

jongste oudste gewildste
Jimmy

Politici bly maar opportuniste. Oor die algemeen beginselloos.

Deon

Aunty Pat gaan nou by die ANC aansluit, op die rug van GOOD.

Frans

Pieter Marais moet liewers nie uitsprake maak nie.Daar was n tyd toe Dr Mulder ook n pos as adjunk minister in die regering beklee het en hy het beslis nie sy party of kiesers verraai nie.

Wonder

So, sy het die mense wat vir die Good party om die bos gelei…wat ‘n skande om dit aan jou kiesers te doen! Of vir geld!!! Ek het meer van haar verwag!

Andreas

Patricia se die Good-party het nasionaal maar 70,408 stemme gekry. Iets maak nie sin oor waarom Cyril haar in sy kabinet wil hê nie. Dit sou interessant wees as hy sy werklike rede met ons kon deel.