Departement ‘diep ontsteld’ oor duisende onnies wat inentings weier

Panyaza Lesufi en sy departement is diep ontsteld dat meer as 9000 onderwysers in Gauteng geweier het om teen Covid-19 ingeënt te word. (Foto: Verskaf)

Die Gautengse onderwysdepartement het Vrydag gesê hy is “diep ontsteld” dat 9 113 onderwysers en onderwyspersoneel – sommige met onderliggende siektetoestande – in dié  provinsie geweier het om teen Covid-19 ingeënt te word.

Dié inentings vorm deel van die regering se massa-inentingsprogram wat daarop gemik is om 582 000 mense in dié sektor landwyd te bereik.

“Ons is uiters bekommerd dat bykans 10 000 personeellede in die Gauteng-onderwyssektor om een of ander rede weier om teen hierdie dodelike virus ingeënt te word wat reeds groot ontwrigting in skole en gemeenskappe gesaai het en geliefdes van ons weggeneem het,” het Panyaza Lesufi, LUR vir onderwys in Gauteng, gesê.

Hoewel die inentings vrywillig is, sê die departement in sy verklaring dat die Wêreldgesondheidsorganisasie mense wat ’n verhoogde risiko loop om die virus op te doen en ernstig siek te word daarvan, aanbeveel om die inentings te kry.

Dit sluit onderwysers, gesondheid- en nooddienswerkers, ouer mense sowel as mense met onderliggende siektetoestande in.

“Deur ingeënt te word kan jy ook help om die mense rondom jou te beskerm aangesien jy beskerming teen die virus sal geniet en dus minder geneig sal wees om die virus te versprei.”

Luidens die verklaring is 53 154 onderwysers en ondersteuningspersoneel reeds by die 56 inentingstasies in Gauteng ingeënt. Dié syfer sal na verwagting volgende week styg.

Daar was glo enkele probleme met die verkryging van inligting by sommige skoolbeheerliggame wat intussen uitgeklaar is.

“Daar moet kennis geneem word dat die weiering om ingeënt te word die regering se pogings om skoolaktiwiteite te normaliseer, asook die akademiese jaar in geheel bedreig,” het Lesufi gesê.

“Onderwysers en ondersteuningspersoneel is in dié sektor geprioritiseer en daar word gevolglik verwag dat hulle van die geleentheid gebruik sal maak om verdere ontwrigting te voorkom.”

Maroela Media het vroeër berig dat al vyf erkende en amptelike onderwysvakbonde die inentingsprogram steun. Dit sluit Sadtu, Naptosa, Natu, PEU en SAOU in.

Duisende onderwysers is reeds landwyd met die Johnson & Johnson-entsof teen Covid-19 ingeënt.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

71 Kommentare

jongste oudste gewildste
melaney

Dit is enige persoon se volste reg om self ‘n besluit te maak.

Persheks Adri

Bly elke persoon se keuse of hulle dit wil hê of nie punt.

Anel

Dis jou reg om te weier!!! Hoekom is die regering so gretig om die mense te ent? Jy mag maar Vigs hê en niemand mag dit weet nie, so ook TB, maar o wee, solank jy nie corona het nie. En nou wil hulle die onderwysers laat skuldig voel!!!

casper

Nou wat nou Lesufi ???

NEO

10 uit 10 vir hulle. Sal ook nie die vacuum neem met my onderligende siekte toestande nie. Ivermectin werk uitstekend.