Departement gaan hof se besluit oor toerisme-rasfonds beveg

Argieffoto (Foto: VBlock/Pixabay)

Die departement van toerisme het aangedui dat hy die appèlhof in Bloemfontein se uitspraak dat swart ekonomiese bemagtiging (SEB) as kriterium vir die departement se hulpfonds onwettig is, sal beveg.

Dié uitspraak, tesame met ’n kostebevel, is verlede maand teen die departement gelewer.

Maroela Media het vroeër berig regter Plasket het in die hof gesê die minister van toerisme, Mmamoloko Kubayi-Ngubane, het ’n regsfout begaan en sy is nie wetlik verplig, soos sy aangevoer het, om geldelike bystand op grond van SEB-vereistes toe te ken nie.

Die departement het verlede jaar die Toerisme-ekwiteitsfonds (TEF) bekendgestel om finansiële bystand aan klein, mediumgrootte en mikro-ondernemings (KMMO’s) tydens die tydperk van algehele afsondering te gee.

Luidens die fonds se kriteria kan slegs ondernemings wat swart eienaarskap van minstens 51% het, in aanmerking kom vir lenings of toelae van dié fonds, wat sowat R1,2 miljard sterk is. AfriForum en Solidariteit het aangevoer dat hierdie kriteria nie wetlik of rasioneel is nie.

AfriForum en Solidariteit het Woensdag aangekondig dat hy bankvas agter die appèlhof se besluit staan en dit in die Konstitusionele Hof sal verdedig.

Volgens die twee organisasies is die toeken van hulpfondse op grond van ras onredelik, en die appèlhof het dit beaam deur hierdie aksie van die departement onwettig te verklaar.

Solidariteit is van mening dat die pandemie alle sakeondernemings in die toerismesektor getref het, ongeag velkleur, en dat die regering die pandemie en staat van inperking uitbuit om sy eie rasse-agenda te bevorder.

Volgens Anton van der Bijl, hoof van regsake by Solidariteit, staan hul regspan gereed om die uitspraak van regter Plasket van die appèlhof te verdedig.

“Ons sal nie toelaat dat die regering sy rassediskriminasie deur middel van staatskanale implementeer nie. Die regering weier om sy verantwoordelikheid teenoor die ganse Suid-Afrika na te kom en kies om slegs op sy eie amptenare en kaders te fokus. Ons sal hierdie optrede nie duld nie en sal voortgaan om teen die regering op te staan en teen hom te veg vir solank as wat hy sy rasse-ideologie en korrupsie voortsit en die mense van Suid-Afrika benadeel,” sê Van der Bijl.

Van der Bijl meen dit is duidelik dat die staat vasbeslote is om sy rasse-agenda ten alle koste te dryf.

“Die departement stel nie in redelikheid belang nie en neem geensins die eienaars van sakeondernemings of werknemers wat tydens die pandemie onder swaarkry gebuk moes gaan, in ag nie. Al waarin die regering belangstel, is om sy ideologie van sogenaamde transformasie te implementeer onder die dekmantel van kastige hulp.”

Jacques Broodryk, AfriForum se veldtogtebestuurder, meen ook die kriteria vir die fonds is rassisties.

“Die staat kan dit as transformasie probeer verbloem, maar hy het lankal sy ware kleure getoon. Dit is uiters laag om die skade wat die regering met sy onredelike Covid-19-inperkingsregulasies aan die toerismesektor berokken het, nou uit te buit om teen mense te diskrimineer. Ons is gereed om verder teen hierdie diskriminasie te baklei,” sê Broodryk.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

24 Kommentare

jongste oudste gewildste
Hardekwas

Voetsek regering. Voetsek rassiste. Voetsek skelms.

Shakespeare

51% BEE is ‘n getoetsde manier om enige besigheid te sink. Dink net, 51% se onbevoegde korrupte kaders se verwoesting wat hulle saai.

AW

Doen dit ASB…

Julle het mos Regte !!

Tog ek Hoop en Vertrou

Dat julle ń behoorlike pakslae sal kry in die Appêl Hof

Johan

Hulle is darem maar rasisties, siestog.

ROELOF

Ja natuurlik weer op “mahala money”. Tyd dat begin word met belasting boikot.