Dept. oor wiskunde: ‘Talle leerders sou druip’

wiskunde argieffoto 2

Argieffoto.

Die departement van basiese onderwys het sy besluit, om wiskunde se slaagsyfer vir gr. 7, 8 en 9 leerders na 20% aan te pas, verdedig.

“Hoofde van regoor die land het die departement in kennis gestel leerders in die gr.7, 8 en 9-seniorfase sal baie sleg vaar indien hulle aan die vereiste slaagsyfer van 40% vir wiskunde moes voldoen,” het Elijah Mhlanga, woordvoerder vir die departement in mediaverklaring, gesê.

Die vereiste van 40% vir wiskunde vir ʼn leerder om sy jaar te slaag, is tydens die implementering van die nuwe leerplan (Caps-kurrikulum) in 2014 ingestel. Daar is van ʼn leerder in dié fase verwag om twee tale te slaag, asook wiskunde, om die akademiese jaar te slaag.

“Die onderwyskringe het gedurende die 2016-akademiese jaar hul kommer uitgespreek oor die slaagvereistes vir hierdie fase en versoek dat die vereistes hersien moet word. Die departement is besig hiermee,” het Mhlanga gesê.

Die departement het intussen besluit om spesiale kwytskelding te gee vir leerders wie se bevordering na die volgende graad nadelig beïnvloed is deur die verpligte vereiste om wiskunde met 40% te slaag.

Volgens Mhlanga was dit die beste besluit wat die onderwysdepartement op kort kennisgewing kon neem en is dit net vir 2016 geldig.

“Die departement glo nie die besluit sal die poging van die leerplan om slaagstandaarde te verhoog, belemmer nie. Standaarde kan net stelselmatig verhoog word en daarom die interimbesluit terwyl ons die beleide hersien,” het Mhlanga gesê.

Debbie Shäfer, die Wes-Kaapse minister vir onderwys, het egter gesê die besluit van die onderwysdepartement is “soos om ʼn verband te plak op ʼn pasiënt in die hoësorgeenheid en te verwag dit sal hom gesond maak”.

“Dit is nie ongewoon om kwytskelding vir leerders te verskaf indien ʼn nuwe leerplan met hoër standaarde in die onderwys geïmplementeer word nie, maar waarom die slaagsyfer vir wiskunde aanpas na 20% en dit nie net hou by die 30% slaagsyfer, soos wat dit voor die nuwe leerplan was nie?

“Ek verstaan ook nie waarom gr. 7 en 8-leerders by die besluit betrek word nie. Gr. 9-leerders het minstens die opsie om wiskundige geletterdheid te neem tot matriek, maar kinders wat net 20% vir wiskunde in gr. 7 en 8 behaal het, gaan beslis net verder sukkel in die volgende twee jaar wat hulle nog die vak moet neem,” het sy gesê.

Shäfer het gesê die tussentydse besluit van die onderwysdepartement spreek nie ‘n veel groter probleem aan nie. “Ons het eenvoudig nie genoeg goeie wiskunde-onderwysers in Suid-Afrika nie.”

Sy stel voor dat onderwysers dadelik beter opgelei word om beter klas in wiskunde vir die seniorfase aan te bied. “In die Wes-Kaap word dit gedoen deur ʼn e-leerprogram waar ons aanlynbronne gebruik om beide leerders en onderwysers met die vak te help. Die model kan landwyd uitgerol word.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

48 Kommentare

jongste oudste gewildste
Anoniem

Shame man hoekom die kinders nog straf om skool toe te gaan… gee hulle hulle matriek en stuur hulle direk Universiteite toe vir verdere studies in Bcom petoging en B.ing klip gooi gee hulle dan ‘n Meesters graad in afbrand en stig ‘n organisasie #mathsmustfall want dit is anyway die Kolonialisme wat dit ingebring het…

Johann

Waarom dan daardie kinders hoegenaamd wiskunde laat neem, net om hul besig te hou? Leer hulle eerder kettie skiet, of kleilat gooi, ten minste doen hulle dan iets waarvan hulle hou.

antjie

Ek sal nie eers droom om sulke half ongeletterde mense indiens te neem nie….dit is n skreiende skande…Wat gaan jy maak as jy op die operasie tafel le….juis met n slaagsyfer van 30% en daai dr moet jou opereer….nee wat dan loop sterwe ek maar in my huis….

Naomi

Dis die departementele vraestelle wat die kinders laat druip het. Regdeur tot graad 11. Daar is goed gevra wat die kinders nooit behandel het nie. Ek voel die kinders wat we’ll wiskunde gedruip het sou nie as daai moeilike onbehandelde vrae nie gevra was in die vraestelle nie. Daai graad 10 en graad 11 kinders moet ook deur gesit word!

Se maar net

Ons president kan ok nie tel nie. Moenie lelik wees nie. Ons moet by hom aan pas… LOL!