Derduisende mediese poste vakant

Foto bloot ter illustrasie. (Argieffoto: Jossué Trejo/pixabay)

Daar heers groot kommer oor die hoë vakaturekoers van mediese personeel in die land.

Die departement van gesondheid het Maandag in die parlement bekendgemaak dat 18,6% van poste vir spesialis‑ mediese personeel in private en staatshospitale reg oor Suid-Afrika tans vakant is. Altesaam 13,7% van poste vir verpleegsters is nie gevul nie. Die provinsie wat die ergste geraak is, is die Vrystaat, waar ʼn kwart van poste nie gevul is nie.

As daar na vakatures vir spesialis‑ mediese personeel gekyk word, is die provinsie met die hoogste getal ongevulde poste die Noord-Kaap, met amper die helfte (46%) van poste wat tans vakant is.

Die Wes-Kaap verteenwoordig die laagste vakaturekoers vir verpleegpersoneel, teen 5,5%, sowel as spesialis‑ mediese personeel, met 9,2% van poste vakant.

Daar is altesaam 21 453 vakante verpleegposte in Suid-Afrika. Die departement het in Maart in ’n geskrewe antwoord aan die VF Plus bevestig daar is altesaam 10 831 verpleegposte net in staatshospitale vakant.

Die departement het in dieselfde antwoord bevestig dat altesaam 1 339 vakante poste vir dokters in die staatshospitale beskikbaar is. Die meeste van hierdie poste is in Limpopo (414), gevolg deur KwaZulu-Natal (257) en Gauteng (174).

Die departement het aan die party gesê dat hy nie al die poste gelyktydig kan vul nie, weens die dienskoste wat negatief beïnvloed word deur die algemene begrotingsbesnoeiings wat deur die nasionale tesourie ingestel is, as deel van fiskale konsolidasie in die staatsdiens.

Philip van Staden, ʼn VF Plus-LP en die party se woordvoerder oor gesondheid, sê die hoë vakaturekoers is ontstellend en dit is duidelik dat daar ’n tekort aan dokters en verpleegsters landswyd is.

“Die probleem gaan nie binnekort opgelos word nie. Die regering moet ook maar eerder sy planne om die Nasionale Gesondheidsversekering (NGV) in te stel, laat vaar. Indien die regering dink dat die NGV hierdie tipe van probleme gaan oplos, leef hulle in ʼn droomwêreld,” sê Van Staden.

Michele Clarke, die DA se woordvoerder oor gesondheid, sê die hoë vakaturekoerse beïnvloed ongetwyfeld die verskaffing van gesondheidsorg van gehalte.

Die DA gaan aan die voorsitter van die portefeuljekomitee vir gesondheid skryf om die departement te versoek om die volgende op te klaar:

  • Die redes vir die hoë vakaturekoerse.
  • Planne oor hoe hierdie vakatures gevul sal word.
  • Hoe die departement beplan om opleidingsverpleegkolleges te versterk.
  • Of die departement sulke vakatures aan binnelandse sake bekend gemaak het ten einde die departement aan te moedig om verpleegkundiges en spesialis‑ mediese personeel by die lys van kritieke vaardighede in te sluit.

“In Maart vanjaar is duisende tydelike Covid-19-personeel boonop laat gaan omdat die provinsiale gesondheidsdepartemente nie die fondse gehad het om personeel te behou nie. Uitdagings in die gesondheidsorgsektor sluit ’n tekort aan mediese vaardighede en ’n tekort aan fondse in om hierdie kritieke vaardighede in die stelsel te absorbeer,” sê Clarke.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

20 Kommentare

jongste oudste gewildste
Lillian

die regering weier blanke studente om medies te swot, meeste van ons medici verlaat die land agv die feit dat hul nie poste kry nie agv van hul velkleur …

Marius

By die staat is dit maklik. Die poste word nie gevul nie want die werwings kantore sit op hul loure en rus. Hul is baie traag met die plasings van advertensies vir vakante poste en dan is daar natuurlik interne inmengery as daar wel mense geplaas word.

casper

Kyk maar net na die rassistiese ANC vir die redes.
My dogter vlieg uit Sondag.
Totsiens nog een dokter SA.

Hennie

Hou nou ook in gedagte dat die staat se mediese personeel BAIE meer salaris en voordele kry as in die privaat sektor. En die poertenjolle wil die Nasionale gesondheid stelsel bestuur.

Harley Davidson

Die regering se diskriminernde beleid teen wit minderhede verhoed ook wit studente om medies te swat agv hulle kwota innames gebaseer op velkleur.