Dereguleer die petrolprys nóú – Solidariteit

Argieffoto ter illustrasie (Foto: Unsplash)

Solidariteit het Woensdag weer ʼn beroep op die regering gedoen “om sy vingers uit die ekonomie te hou” en burgers toe te laat om hul salarisse op hulself te spandeer, eerder as om dit in die staat se sakke te laat beland.

Die organisasie meen die petrolprys moet “onmiddellik” gedereguleer word, nadat ’n hooflyninflasiekoers van 5% vir September aangekondig is. ʼn Massiewe verhoging in die petrolprys word boonop reeds vir volgende maand voorspel weens die swak wisselkoers en stygende olieprys.

Die inflasiekoers is weereens heelwat hoër is as waaraan verbruikers oor die afgelope paar jaar gewoond geraak het, terwyl die voedselprysinflasie (7%) vir September hoër as die algemene inflasie is.

Volgens Statistieke Suid-Afrika (StatsSA) het die hooflyninflasiekoers op 4,9% in Augustus en 4,6% in Julie gestaan. Die Suid-Afrikaanse Reserwebank se doelwit is om ʼn gemiddel van 4,5% te handhaaf.

Elektrisiteit en ander huishoudelike brandstowwe het boonop die afgelope jaar met ʼn skrikwekkende 14% gestyg, terwyl die voertuigbrandstofinflasie met 19,9% gestyg het.

Solidariteit meen dié styging is die “ergste” en vestig die aandag dan op volgende maand se verwagte reusestyging in die brandstofprys wat Maandag aangekondig is.

“Juis daarom doen ons ʼn beroep op die regering om sy greep op brandstofpryse te laat vaar,” sê Theuns du Buisson, ekonomiese navorser by die Solidariteit Navorsingsinstituut.

Du Buisson meen dit is van kardinale belang dat die belasting op brandstof onmiddellik verlaag moet word en dat die petrolprys ook gedereguleer moet word soos die dieselprys. Volgens hom sal mededinging in die petrolmark tot almal se voordeel wees.

“Brandstofprysinflasie sypel deur na amper elke ander produk in die inflasiemandjie, en daarom behoort dit die heel eerste plek te wees waar die regering ʼn verskil kan maak. Soos met amper alle regeringsingrype, is sy pogings om die bedryf te reguleer tot nadeel van almal in Suid-Afrika.”

Maroela Media het vroeër berig motoriste kan volgende maand moontlik weer ’n aansienlike styging in die brandstofpryse, van amper R1 in petrol en meer as R1 in diesel en paraffien, verwag.

Die Automobiel-Assosiasie (AA) het dié styging as katastrofies beskryf, veral in die lig van stygings die afgelope maande.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

30 Kommentare

jongste oudste gewildste
Martie Smartie

Sonder prysregulering sal petrol vertiendubbel

Kokerboom

Die Staat is besig om die middelklas melkkoei “dood” te bloei net om hul skandalige onbeheersde uitgawerekening te laat klop! Dis net die gierige onbeholpe onbevoegde ANC regering wat so roekeloos kan optree! Vraag is: Hoe lank kan middelman dit nogso sito sito aanvaar?!!!

Aai

Die nuwe wet van SA bly net aan die lewe niks meer as dit.

Tipper

Jy sal met hom niks kan begin nie,en jy sal met hom niks uitvoer nie.

Juffrou

Druk hulle vet vingers in ALLES! Sodat nóg meer in hulle sakke kan beland.