Deursigtige ondersoek geëis ná Watson se dood

Gavin Watson. (Foto: Bosasa)

Die afsterwe van Gavin Watson, die uitvoerende hoof van die eertydse Bosasa, kan ʼn groot impak hê op die werk van die Staatskapingkommissie, en dit is dus noodsaaklik dat die SAPD ʼn deeglike en deursigtige ondersoek moet doen as daar net ʼn sweempie is van vuilspel.

Só sê Solly Malatsi, woordvoerder van die Demokratiese Alliansie ná Watson Maandagoggend verongeluk het.

Watson is dood in ʼn ongeluk op die R21 naby die OR Tambo Internasionale Lughawe. Lt.kol. Katlego Mogale, woordvoerder van die polisie, het in ʼn kort verklaring bevestig ʼn 73-jarige man het in die ongeluk gesterf. Volgens Mogale het die bestuurder van die motor beheer oor die voertuig verloor en teen ʼn betonpilaar van ʼn brug oor die snelweg gebots. Hy is op die toneel dood. ʼn Saak van strafbare manslag word ondersoek.

Papa Leshabane het in ʼn verklaring namens die Watson-familie en African Global Operations (voorheen Bosasa) Watson se afsterwe bevestig. Hy het die publiek en die media versoek om die familie die ruimte te bied om privaat te treur. Die familie sal nie enige onderhoude toestaan nie.

Malatsi het bygevoeg die polisie moet die omstandighede ondersoek rondom die ongeluk van die Bosasa-hoof, wie se maatskappy miljarde rand se tenders van die regering ontvang het en miljoene rande in die koffers van die ANC in die algemeen gekanaliseer en spesifiek die veldtog van pres. Cyril Ramaphosa.

“Die polisie moet ʼn deeglike en deursigtige ondersoek van stapel stuur om seker te maak dat ander getuies nie geïntimideer word deur hierdie voorval nie en dat die Kommissie van ondersoek na staatskaping sy werk sonder vrees of guns kan uitvoer.”

Volgens Malatsi het Angelo Agrizzi se getuienis, en die onthullings deur DA-leier Mmusi Maimane aangedui dat Watson baie te sê sal hê voor die Zondo-kommissie van ondersoek.

“Ons doen ʼn beroep op die polisie om die land in sy vertroue te neem sodra die ondersoek na Watson se afsterwe afgehandel is.

“Ons betuig ons innige meegevoel met sy familie en geliefdes in hierdie tyd.”

Pule Mabe, nasionale woordvoerder van die ANC, het die party se skok uitgespreek oor Watson se afsterwe.

“Watson en sy broers, Ronnie, Cheeky en Valence, het al van jongs af hul met die struggle na vryheid vereenselwig en sy aan sy met talle landgenote geveg teen apartheid,” het Mabe bygevoeg.

Die Watson-broers was bekende aktiviste in die United Democratic Front (UDF) en binne die ANC se ondergrondse strukture in daardie stadium.

Die ANC het ook sy meegevoel met die familie, vriende en kollegas van Watson betuig.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

64 Kommentare

jongste oudste gewildste
Lina Carstens

Nou toe nou.

marous

Ekskuus? Aktiviste met donder wolke oor die koppe soos al die ander ?

Crimesa

En nou is die land bankrot getender en staatskapers weg met belastingbetalers se geld!

jennefer

Remme dalk nie gewerk nie??

jennefer

Remme dalk nie gewerk nie?? Is dit werklik hy?