Dié kleinhandelaar laat jou beursie glimlag

(Argieffoto: Unsplash)

Jou inkopiemandjie word elke maand duurder en al hoe meer mense sukkel om hul begrotings te laat klop. Die redes hiervoor wissel van die oorlog in Oekraïne tot ʼn swakker rand en natuurlik rampe soos die onlangse oorstromings in KwaZulu-Natal.

Die maatskappy JustMoney sê hoë lewenskoste – en veral die prys van kos – raak almal. Die maatskappy het vanjaar weer navorsing oor die pryse van 13 basiese items by drie van die bekendste kleinhandelaars gedoen.

Verlede jaar het JustMoney die koste van 12 basiese voedselitems by drie groot kleinhandelaars bereken – Checkers, Pick n Pay (PnP) en Woolworths. Vanjaar is nog ʼn item by die mandjie gevoeg – kookolie – waarvan die prys die afgelope ruk geweldig gestyg het. Die styging word onder meer toegeskryf aan ʼn wanpassing tussen vraag en aanbod, asook die onnodige opeenhoping van die produkte.

Pick n Pay stap vanjaar met die louere weg – al is dit ook net-net – as die kleinhandelaar waar verbruikers die minste vir die 13 items betaal.

PnP se 16-stuk-hoenderpakke het R83,82 gekos op die dag wat JustMoney sy inkopies gedoen het, terwyl ʼn soortgelyke item R124,18 by Checkers gekos het, en R186,28 by Woolworths.

By PnP het ʼn 2,25 ℓ-bottel Coca-Cola net R13 gekos, in vergelyking met die R17,99 wat Checkers gevra het, en die R20,99 wat JustMoney daarvoor by Woolworths opgedok het.

Vanjaar se mandjie bevat een item elk van die volgende:

• 1 witbrood
• klein pakkie piesangs
• 2,5 kg suiker
• 80 Freshpak Rooibos-teesakkies
• 1 ℓ-langlewemelk
• 2 ℓ-kookolie
• 410 g-blikkie bone
• 9 rolle toiletpapier
• 2,25 ℓ-Coca-Cola
• 16 stukke rou hoender
• 2 kg aartappels
• 2 kg witrys
• 2 kg Sunlight 2-in-1-waspoeier

Verlede jaar het die prys van ʼn mandjie R368,71 by Checkers gekos. By PnP het die betaalstrokie vir die items R411,99 gewys en by Woolworths was dit R442,34.

Die bottel kookolie het vanjaar bygekom en die pryse van die kosmandjies lyk nou só:

• Pick n Pay: R519,71
• Checkers: R521,06
• Woolworths: R624,16

“Ons raad aan verbruikers is om deur die rakke by verskillende supermarkte te stap, of vergelykings te tref op inkopie-apps. Daar is heelwat afslag en spesiale aanbiedinge te vinde,” sê Shafeeka Anthony, bemarkingsbestuurder van JustMoney.

Lojaliteitsprogramme kan jou ook ʼn hele paar rand help spaar.

Verlede jaar het PnP se Smart Shopper die beste voordele gebied, terwyl dié eer vanjaar aan Checkers gaan. Groot besparings was beskikbaar sodra jy jou Xtra Savings-kaart gebruik, sê JustMoney.

Danksy die lojaliteitsprogram was die prys van nege rolle Rose Collection-toiletpapier verminder van R69,99 tot R59,99, twee 2,25 ℓ-bottels Coca-Cola het R30,99 gekos (gewoonlik is dit R17,99 of R36 in totaal), terwyl ʼn 2 kg-sak Spekko-witrys danksy ʼn Xtra Savings-kaart R24,99 gekos het, pleks van die R32,99 daarsonder.

Woolworths het dalk nie die goedkoopste kosmandjie gehad nie, maar was “tops” wat betref ʼn inkopie-ervaring. Die winkels is ontwerp vir inkopiegerief en produkte word aantreklik uitgestal, sê JustMoney.

Woolworths het boonop ʼn koffiewinkel waar gehaltekoffie teen R23 – met ʼn WRewards-kaart – gekoop kan word, terwyl dit jou tot R40 elders kan kos.

JustMoney sê sy navorsing wys daar is, ondanks stygende pryse, steeds maniere om te spaar. Groot kleinhandelaars reik uit na verbruikers met onder meer spesiale aanbiedinge in hul winkels, items wat nuut op die mark is, of multi-item-aanbiedinge.

“Dit maak finansiële sin om ʼn slimmer inkopieganger te word, koste van soortgelyke produkte te vergelyk, belonings met lojaliteitskaarte te versamel en te bereken wat ʼn grootmaataankoop sou kos,” sê Anthony.

“Hierdie berekeninge, en die uitslag van JustMoney se jongste opname, onthul waar die beste besparings gevind kan word.”

Aanlyn inkopies kan jou ook ʼn paar rand spaar omdat jy op hierdie manier byvoorbeeld nie brandstof gebruik nie en nie vir parkering hoef te betaal nie. Boonop is daar geen aanloklikhede wat jou dalk geld kan laat bestee aan iets wat nie op jou inkopielysie was nie.