Dié loonverhoging ‘klap in gesig’ van munisipale werkers

Samwu se lede het ’n loonverhoging van R4 000 geëis. (Foto: Samwu/Twitter)

Daar is ná uitgerekte onderhandelinge tussen die munisipale werkersvakbond Samwu en die Suid-Afrikaanse plaaslike regeringsvereniging (Salga) eindelik ’n 4%-loonverhoging voorgestel vir die werkers van al 257 munisipaliteite in die land.

Samwu meen dié voorstel is ’n “klap in die gesig” van munisipale werkers wat ’n loonverhoging van R4 000 en ’n minimumloon van R15 000 geëis het.

“Hierdie voorgestelde verhoging beteken dat die munisipale werkers wat die minste betaal word, ’n salarisverhoging van R356 voor belasting ontvang,” lui ’n verklaring deur Samwu.

Samwu het verlede Maandag die voorstel van ’n driejaarsalaris-en-loonooreenkoms vanaf ’n fasiliteerder ontvang. Dié fasiliteerder is versoek om in die bresse te tree en ’n voorstel te maak nadat Samwu en Salga ná vier rondes van onderhandeling steeds nie tot ’n vergelyk kon kom nie.

Samwu is egter ongelukkig met die voorstel en meen die fasiliteerder het versuim om ag te slaan op munisipale werkers se griewe.

Die werkers het vanjaar ’n enkele jaarooreenkoms met die werkgewer geëis en aangevoer dat jaarlikse salaris- en loononderhandelinge in dié stadium die beste vir die sektor sal wees aangesien die toekoms onseker is.

“Ondanks die feit dat [Salga] tydens die onderhandelinge gesê het dat hy bereid is om ’n enkele jaarooreenkoms te oorweeg, het die fasiliteerder egter uit haar eie voorgestel dat partye ’n ooreenkoms van drie jaar moet sluit.”

Samwu sê die fasiliteerder het ook nie toegegee aan die vakbond se eise rakende behuisingstoelae, kraamverlof van ses maande vir nuwe moeders en vaderskapsverlof van een maand nie.

Samwu sê die fasiliteerder se voorstel is in werklikheid bloot ’n herhaling van Salga se voorstelle en aanbod gedurende die onderhandelinge.

Die vakbond beskuldig die fasiliteerder nou daarvan dat sy bevooroordeeld teenoor Salga is.

Die fasiliteerder het onder meer die volgende voorgestel:

  • ʼn Driejaarsalaris-en-loonooreenkoms.
  • ʼn Salarisverhoging van 4% in die eerste jaar van die ooreenkoms en verwagte verbruikersprysinflasie (VPI) minus 1% in die ander jare van die ooreenkoms.
  • ʼn Algehele bevriesing van alle voordele vir munisipale werkers tydens die eerste jaar van die ooreenkoms. Die voordele sal eers in die laaste jaar van die ooreenkoms volledig beskikbaar wees en in werking gestel word.
  • Sektorale minimumloon sal slegs verhoog word in ooreenstemming met salarisverhogings.
  • Die moontlikheid vir Salga om namens alle munisipaliteite aan hierdie en toekomstige gesamentlike ooreenkomste te onttrek.

Samwu wys in sy verklaring daarop dat net voedselinflasie meer as 10% is terwyl ander lewenskoste ook aansienlik gestyg het.

“Werkers het ’n salarisverhoging van R4 000 geëis om te verseker dat die loongaping in die sektor vernou en dat werkers ordentlike verhogings kry. Weereens het die fasiliteerder die werklike eise van werkers verwaarloos en voortgegaan om die bieëry vir die werkgewer te doen en ’n  salarisverhoging onder inflasie voorgestel,” sê die vakbond.

Die vakbond het geëis dat die sektorale minimumloon R15 000 moet wees. Volgens Samwu toon navorsing dat dié bedrag benodig word om ’n behoorlike bestaan in Suid-Afrika te maak. “Daar moet opgelet word dat die meeste munisipale werkers tans minder as R15 000 verdien en dus nie ’n ordentlike lewe kan lei nie.”

Samwu sê hy gaan die voorstel aan sy lede voorlê. Hulle sal ook kan stem ten gunste van ’n moontlike staking, sou hulle die voorstel verwerp.

Samwu se lede het tot 22 Junie om vir die voorstel te stem.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

33 Kommentare

jongste oudste gewildste
Swerwer

Wat verstaan die Vakbonde en hul lede nie. Daar is nie geld nie. Toi toi soveel soos julle wil.
Staak en breek af, dit kan nie die situasie verander nie. Die Regering het ons land bankrot gemaak.
Uiteindelik begin dit dalk deurdring dat ons “nie welkome burgers” in die land nog altyd vir
hul geslagte gesorg het. Maar nee, staan 1 karismatiese burger voor hul en snou hul allerhande
goed toe oor ons “nie welkome burgers” dan is almal opgesweep en wil net “demand”. Tyd dat jul wakker skrik.

Anel

En wat regverdig dit? Daar is mense wat afgedank word want daar is nie meer geld nie! Wees bly julle het werk en kry salaris. As julle nie tevrede is, loop. Iemand anders sal te dankbaar wees om dit te doen.

Phillip

Ek wonder maar net waar is Imatu hoor niks van hulle nie dalk van fakbond verander sal ek se

Debby

Ek kry al vir 8 jaar dieselde salaris, geen verhoging, geen medies geen pensioen en geen oortyd, moet ek ok begin toi toi en net so terloops dis baaaie minder as R15000

Pieter

As ek sien hoe vuil ons dorpe is dan moet julle klomp nie eers selarisse kry nie.