‘Die rand kan maar val’, sê ANC-jeugligaleier

Collen Maine. Foto: Carla Bernardo/ANA

Collen Maine. Foto: Carla Bernardo/ANA

Collen Maine, die president van die ANC-jeugliga, het Woensdag gesê indien die rand moet verswak sodat die ANC die ekonomie kan beheer, dan is dit maar hoe dit moet wees.

“Ons voel die heeltyd bedreig deur rommelstatus. Ons moet optree. As die rand moet val, dan moet dit val. Wanneer dit weer versterk, moet dit ons wees wat in beheer is,” het hy gesê.

Maine het Woensdag in Durban by ʼn lesing oor ekonomiese vryheid gepraat wat deur die jeugliga gereël is. Maine het die rand “problematies” genoem en gesê die ANC se “grootste probleem is die nasionale tesourie”.

“Die rand is problematies. Gedurende die verkiesing toe daar gesê is die ANC het nie goed gedoen in die metro’s nie, het die rand sterker geword. Hoekom is ons banger vir graderingsagentskappe en geldmarkte as vir die mense van Suid-Afrika,” wou hy weet.

Maine het ook gesê pres. Jacob Zuma was in 2015 gedwing om die aanstelling van Des van Rooyen as minister van finansies terug te trek. Maine het hom direk tot Zuma gewend, wat ook op die verhoog was, en gevra: “Hoekom het jy geswig onder die druk?”

Maine het gesê dit was moeilik om ʼn reguit antwoord te gee op ʼn vraag of die nasionale demokratiese revolusie op die regte pad is. “Ek sê vir mense ja en nee. Ja, want ons het al baie bereik, maar nee, omdat die ANC geïnfiltreer is deur mense in leierskapsposisies wat op ander plekke verantwoording doen.” Maine het gesê Suid-Afrikaners se “geduld is besig om min te raak”.

Hy het gesê die ANC moet ontslae raak van mense wat die “kapitaal beskerm”. “Daar is mense in die ANC-leierskap wat gemaklik geraak het ná 1994. Hulle ry met Duitse motors en het die [ekonomiese] revolusie vertraag. Ons soek ons grond en ons soek ons minerale terug. Ons wil die Reserwebank nasionaliseer,” het hy gesê.

Hy het bygevoeg slegs jongmense kan suksesvolle revolusies lei. Hy het gekap na ANC-lede wat meen staatsinstansies soos SAL moet geprivatiseer word. “Staatsinstansies moet nie geprivatiseer word nie. Die probleem hier is weer eens die tesourie,” het hy gesê. “Mnr. die president, ons praat oor radikale ekonomiese transformasie, maar met respek, dit bly net by praat.”

Maine het gesê die ANC het nie geveg vir vryheid sodat hulle kospakkies aan armes kan uitdeel nie. “Ek haat kospakkies. Ons mense wil die eienaars wees van die middele van produksie sodat hulle hul eie kos kan maak.”

Hy het ook gesê daar is genoeg geld beskikbaar om gratis tersiêre onderrig vir armes beskikbaar te stel. “Die goewerneur van die Reserwebank is nie daar vir die mense nie. Waar is die voormalige ministers van finansies wat nie meer in die tesourie is nie? Ons grootste probleem is die korrekte departement van finansies. Daardie departement moet getransformeer word.”

Hy het gesê indien die jeug ʼn verskil in die ekonomie teweeg wil bring, moet hulle die leierskap van die ANC “ongemaklik maak”.

“Die lewe is nie maanskyn en rose nie. Ons, die werkloses, haweloses en grondlose jeug, sal op ʼn punt gedwing word om grond te beset en ons sal begin by die wynplase in die Kaap,” het hy gesê.

Ander regeringsamptenare wat na Maine se toespraak geluister het, was Nathi Mthethwa, minister van kuns en kultuur, Zandile Gumede, die eThekwini-burgemeester en Super Zuma, die provinsiale sekretaris van die ANC in KwaZulu-Natal. Dudu Myeni, die voorsitter van SAL, en Jimmy Manyi, die president van die Progressive Professionals Forum, het ook in die voorste ry na Maine sit en luister.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

64 Kommentare

jongste oudste gewildste
Veronica

Genade pleks hulle maar liewer stilbly as om hulle onkunde so openbaar te maak. As die slaagsyfer 20% word gaan hulle net nog dommer wees. Om te dink hulle is die toekomstige leiers.

Moeggepraat

Vra vir Zim wanneer hulle geld eenheid weer gaan versterk….

D

Ja/nee. Met graad nul wil hulle die ekonomie beheer. Lagwekkend.

pieterdp

Die sot wat hom self n president noem, weet nie wat hy praat nie.
Self ry en vlieg hy met vervoer wat van die buite land af kom.
Wat gaan hy maak as die swart volk op sy kop spring van honger.
Geld laat print soos Zim.

John

Kan ‘n mens dit oorvertel, soos die antie altyd se, die president en ministers hang aan die lippe van die nat-agter-ore-ANC-Jeugliga se grootbaas; ‘n politieke en finansiele kenner. Hulle het nie ‘n ‘clue’ waar geld vandaan kom nie… nes kinders… ‘n Verrassing wag… onthou daai stormpie van annerdag?