Argieffoto
ʼn 40-jarige vermeende motordief is Donderdagoggend uit sy slaap wakker geskud en in hegtenis geneem.
Volgens kapt. Colette Weilbach, polisiewoordvoerder, het polisiebeamptes ʼn wit Mitsubishi-voertuig met koeëlgate op ʼn erf in Eersterust, Pretoria, opgemerk. Dit kom nadat beamptes inligting opgevolg het oor ʼn motordief wat na bewering in dié omgewing bedrywig is.
Weilbach het gesê die verdagte het in ʼn kamer lê en slaap in die huis waar die voertuig gevind is. “Hy kon geen verduideliking gee vir die koeëlgate in die voertuig nie.”
Volgens Weilbach is daar op verskeie motorsleutels, skootrekenaars en toerusting wat gebruik word om by motors in te breek beslag gesê. “By verdere ondersoek het ons vasgestel dat die betrokke voertuig in Oktober in Eersterust gesteel is.”
Die verdagte sal in die Pretoria-landdroshof verskyn op aanklagte van motordiefstal en besit van gesteelde goedere. “Ons ondersoek die moontlikheid dat die verdagte ook met ander misdade verbind kan word,” het Weilbach gesê.
Maj.genl. Jimmy Ledwaba, bevelvoerder van die Sunnyside-polisiekantoor, het gesê die polisie doen alles in sy vermoë om misdaad te voorkom en te beveg tydens die feesseisoen. “Hoë sigbaarheid van beamptes op strategiese plekke oor die Kerstyd sal ʼn veilige feestyd vir almal verseker,” het Ledwaba gesê.
Dis net in die feesseisoen wanneer hulle werk, ook nie almal nie.
Die res van die jaar eet hulle net KFT.
Lol na aanleiding v slapende polisielede in aanklagkantore, moes hulle seker hul wekkers gestel het om wakker te word voor hulle hom kon gaan wakker maak!