Dienssentrum met petrolbomme bestook

Argieffoto

Die Stad Johannesburg se Jabuvu-kliëntedienssentrum in Soweto is beskadig toe ʼn brandende motorband en twee petrolbomme in een van die kantore in gegooi is.

Funzela Ngobeni, burgemeesterskomiteelid vir finansies, sê skade is net aan die binnekant van een kantoor aangerig. Die sentrum se bestuur het gesê die voorval het Donderdagaand plaasgevind ná ʼn reeks Eskom-verwante kragonderbrekings in die gebied.

“Geen werknemers of inwoners is tydens die aanval beseer nie. Ons is besig om maatreëls in te tref om te verseker dat bedrywighede by die sentrum voortgaan,” het Ngobeni gesê.

Hy het namens die Stad die voorval ten sterkste veroordeel en gesê daar sal seker gemaak word dat die skuldiges aan die pen ry. “Hoewel die gemeenskap volle reg het om gegrief te wees weens die swak dienslewering deur die nasionale kragvoorsiener, is sulke aksies ongeregverdig omdat dit ʼn impak op die gemeenskap het en hulle van toegang tot basiese munisipale dienste ontneem.”

Ngobeni het gesê die stad het reeds bykomende sekuriteit, insluitend Johannesburgse Metropolisielede, in en om die sentrum ontplooi.

Sake van brandstigting en opsetlike saakbeskadiging is by die polisie aanhangig gemaak.