Dis dalk weer binnekort ‘ligte uit’

Argieffoto ter illustrasie. (Foto: Janosch Diggelmann/Unsplash)

Eskom het Maandag gewaarsku dat beurtkrag dalk op kort kennisgewing ingestel kan word aangesien die kragnetwerk tans onder erge druk verkeer – veral gedurende spitstye.

“Hoewel die kragstelsel genoegsaam herstel het om deur die dag ten volle aan die vraag na elektrisiteit te voldoen, kan beurtkrag moontlik gedurende die aand ingestel word sou daar verdere onderbrekings in die beskikbare kapasiteit wees.”

Die kragvoorsiener sê een kragopwekker elk by die Kusile- en Kendal-kragstasie behoort voor vanaand weer tot die stelsel gevoeg te word. Indien hierdie opwekkingseenhede nie kan terugkeer soos verwag nie, sal die kragnetwerk ernstig beperk word, wat ʼn verhoogde kans van beurtkrag op kort kennisgewing tot gevolg sal hê.

“Die herstel van kragopwekkers by die Matimba- en Lethabo-kragstasie, asook twee eenhede by Hendrina en drie by Tutuka, word tans vertraag, wat die moontlikheid verhoog dat die aanbod gedurende die aand beperk sal wees.”

Beurtkrag is verlede week ingestel nadat daar ʼn tekort aan opwekkingskapasiteit was toe van hierdie kragopwekkers onklaar geraak het.

Volgens Eskom het die aanbreek van winter veroorsaak dat daar ʼn groter vraag na elektrisiteit is, veral gedurende die oggend en aand. Gevolglik sal die kragnetwerk dwarsdeur die winter onder druk wees.

“Ons doen ʼn beroep op alle Suid-Afrikaners om elektrisiteit spaarsamig te gebruik, veral tussen 05:00 en 09:00, asook tussen 16:00 en 22:00,” sê die kragvoorsiener.

“Ons het tans 3 049 MW wat weens beplande instandhouding nie beskikbaar is nie, terwyl nog 14 985 MW se kapasiteit nie beskikbaar is nie as gevolg van eenhede wat onverwags onklaar geraak het.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

17 Kommentare

jongste oudste gewildste
Swerwer

Ai ai en ons is die Pous

Papsak

Ag nee nie alweer nie asseblief tog

Marius

Nou ja. Dit is die gevolg van onkundigheid, swak instandhouding en jare se rus op die loure.

Riaan

Die wiskunde som maak lankal nie meer sin nie. Ek dink dit het tyd geword om die mense wat die herstel werk doen onder die vergrootglas te plaas. Die reelmaat waarop “herstelde” stasies weer probleme gee is totaal onaanvaarbaar. Dit dui op swak vakmanskap, of sabotasie. Persoonlik dink ek dit is beide.

JohanR

And who do we have to thank…….THE A N C!