Dit gaan jolig in tronk, wys video

Te oordeel na ’n video wat uit St. Albans-gevangenis in Port Elizabeth gesmokkel is, gaan dit vrolik in tronke waar drank en selfone veronderstel is om verbode te wees.

Drie jaar nadat die departement van korrektiewe dienste (DKD) groot gewag gemaak het van tegnologie om selfone uit tronke te hou, het ʼn nuwe video opgeduik waarin gesien kan word hoe gevangenes in Port Elizabeth se berugte St. Albans-gevangenis mobiele toestelle vrylik gebruik.

In die video kan ook gesien word hoe verhoorafwagtende gevangenes blykbaar alkohol drink in dié Oos-Kaapse gevangenis. African News Agency (ANA) het die video van ʼn betroue bron bekom wat naamloos wil bly. Dis glo opgeneem in ʼn sel in die medium A-deel van die korrektiewe sentrum.

Volgens die bron het die mans na bewering die dood van ʼn bendeteenstander buite die gevangenis gevier. Die man wat oënskynlik besig is om te drink, is geïdentifiseer as Shelton (Sella) Malgas, terwyl die ander man in die video na bewering Whaldred Cona is. Hulle verkeer in ʼn vrolike luim terwyl hulle rap-musiek luister.

Malgas staan saam met Elgershwin Goliath, Nealon Redhouse en Deon Harmse tereg vir die moord op die berugte bendebaas Donovan (Staal) Berry. Dié is in Mei 2016 in ʼn koeëlreën doodgeskiet in wat blykbaar ʼn teregstelling deur opponerende bendes was op Bethelsdorp.

ANA het ook al gesien hoe gevangenes in St. Albans gereeld hul WhatsApp-status bywerk. En dikwels deel hulle foto’s van hulself in hul oranje tronkoorpakke.

DKD het in 2015 reeds gesê die installering van tegnologie om selfone in tronke op te spoor, is in ʼn gevorderde stadium. In 2016 het DKD gesê die tegnologie word landwyd geïnstalleer om selfone tot binne enkele meter in ʼn gevangenis op te spoor.

Maar twee jaar later het St. Albans steeds nie so ʼn opsporingstelsel nie. Bewaarders moet gevangenes deursoek om beslag te probeer lê op die honderde selfone wat na bewering binne-in die tronk gebruik word.

Singabakho Nxumalo, DKD-woordvoerder, het erken St. Albans het nie ʼn opsporingstelsel nie, maar wou nie sê watter ander korrektiewe sentrums dit wel het of nie het nie. Hy meen dit sal ʼn bedreiging vir die veiligheidstelsel van die landwye gevangenisnetwerk inhou as hy sou sê watter ander korrektiewe sentrums dit wel het of nie het nie.

Hy sê gedurende September is St. Albans vier keer deursoek en is daar op 67 selfone beslag gelê. In dieselfde maand is ʼn bewaarder in hegtenis geneem vir die besit van dwelms, 17 selfone, vier selfoonbeginnerspakke en ʼn iPhone-laaier.

Dit gebeur wêreldwyd dat selfone tronke binnegesmokkel word omdat die tegnologie ingespan kan word om ontsnappings te beplan, in hofsake in te meng, getuies te intimideer of selfs teenstanders buite die gevangenis om die lewe te bring.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

32 Kommentare

jongste oudste gewildste
willie

Dit is algemene kennis hierdie regering stel nie belang in oplossings nie! Hoe moeilik kan dit tog wees om die ontvangs van selfone in tronke te blokkeer net soos wat die plaasaanvallers doen! Net soos wat die owerheid nie die handel in “nonferrous metal” strenger wil reguleer nie om koperdiefstal te stop nie! Waar daar nie ñ wil is nie, is daar nie ñ weg nie!

Johann

Shame julle. Seker nie gedink gewetenlose barbare moet actually swaarkry in die tronk nie? Verontgerief word? Gestraf word? Hulle het mos danksy die ANC LEGACY regte en voorregte wat in EN uit die tronk!

aj

Universiteit vir Misdadigers!

AW

Another practical example of how Tertiary Crime Prevention are failing in practice and theory.

Peet

Solank as wat korrupsie seevier, sal GEEN tegnologie die oorhand kry nie.