‘Dlamini-Zuma is self die grootste probleem in munisipaliteite’

Nkosazana Dlamini-Zuma (Foto: Jairus Mmutle/GCIS)

Die probleme in munisipaliteite sal nie ophou solank die ANC en by name die minister van samewerkende regering, dr. Nkosazana Dlamini-Zuma, in beheer daarvan is nie, het die LUR vir samewerkende regering in Wes-Kaapland, Bonginkosi Madikizela, Donderdag in die parlement gesê.

Hy het deelgeneem aan die Nasionale Raad van Provinsies se debat oor die aangepaste begroting vir die departement van samewerkende regering en tradisionele sake.

Dlamini-Zuma se inset het grootliks bestaan uit ‘n lesing oor Covid-19, gevolg deur ‘n teoretiese oorsig oor munisipale regering. Sy het haar nie verwerdig om oor die spesifieke omstandighede in munisipaliteite te praat nie, ten spyte van die verdoemende onlangse bevindings van die ouditeur-generaal, Kimi Makwetu, dat bykans geen ANC-beheerde munisipaliteit in die land ‘n skoon oudit kon verwerf nie.

Dlamini-Zuma het uitgewys dat die land tans die agtste hoogste getal Covid-19-gevalle ter wêreld het.

“Niemand is veilig totdat almal veilig is nie,” het sy geprewel, voordat sy aangevoer het die regering se nuwe distriksmodel vir plaaslike regering is ‘n groot verbetering, en gesê het die Ontwikkelingsbank ondersteun haar departement om hul vaardigheidstekort aan te vul.

Dlamini-Zuma het herhaal dat R20 miljard ekstra aan nuwe voorwaardelike munisipale toelaes kragtens die rampbestuurmaatreëls bewillig word, spesifiek vir infrastruktuur in landelike gebiede en townships.

Die minister het gesê sy sal nie te veel sê oor die vordering met die nasionale administrasie van Noordwes nie – die geleentheid daarvoor sal volg.

ANC-sprekers het insgelyks grootliks gekonsentreer op die koronavirus en oproepe om sterker optrede teen korrupsie, sonder spesifieke verwysing na enige optrede teen ANC-lede.

Die DA-LP Carin Visser het verwys na die bedrog, korrupsie en wanbestuur in ANC-munisipaliteite, met spesifieke feitelike verwysings na byvoorbeeld die Naledi-munisipaliteit in Vryburg, wat R1 200 per gesigmasker aan ‘n tenderpreneur betaal, en die OR Tambo-distrik (die voormalige Transkei) se vermorsing van geld op sogenaamde koronavirus-inligtingsessies.

Visser het dit as ‘n feit gestel dat geen munisipaliteit wat al ooit onder administrasie geplaas is, beter anderkant uitgekom het nie.

“Die departement is die grootste gemors ooit. Finish en klaar,” het sy afgesluit.

Namens die VF Plus het hul LP, Fanie du Toit, gesê om munisipaliteite aan Dlamini-Zuma se departement toe te vertrou, is soos om vir ‘n siek kind gif te gee. Hy het verwys na rou riool wat in riviere en dorpe se strate afloop, asook na die gebrekkige kontrole en korrupsie terwyl die ANC weier om sy korrupte kaders tot orde te roep.

In haar repliek het Dlamini-Zuma toegegee dat die ANC baie by die DA kan leer oor skoon oudits, maar gesê die DA respekteer nie mense se menseregte nie want hulle verwyder grondbesetters in die winter.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

21 Kommentare

jongste oudste gewildste
Mariana

Nou wie is sy om oor menseregte te praat, sy skend elke dag menseregte. Maar dis maklik om ander te beskuldig as jy self agter die deur staan.

Persheks

Volg die gelg presies soos sy en haar kinders geld maak op swart mark met verkoop van onwettige sigarette en drank! GEEN vervolging nie net korrupsie!!!

Joos

Amper lewer ek kommentaar maar het my weerhou. Stilbly is ook n antwoord!

Sandra

Wens die regering wil so sterk oor besetting voel soos oor sigarette en wyn.

Jacobus

Geen twyfel hoegenaamd – trouens enige ding wat sy aanraak is ‘n probleem in wording. Daardie unieke, gevaarlikke kombinasie van onnosele, onbevoegde, korrupsie. Gevaarlik as iemand in magsposisie stupid is en dit nie besef nie. Voorbeelde in kabinet is legio.