ʼn 23-jarige vrou van Bloemfontein is in hegtenis geneem in verband met die moord op haar ma twee weke gelede.
Sers. Ikobeng Hlubi, woordvoerder van die polisie, sê die moord het op 23 Januarie in die Bloemside 2-woongebied plaasgevind. Polisiebeamptes is na die huis ontbied waar daar beweer is dat aanvallers die huis binnegekom en die vrou aangeval en met messe gesteek het.
Die oorledene se dogter het beweer haar ma het haar van die aanvallers probeer beskerm toe sy gesteek is. Die aanvallers het volgens haar onmiddellik ná die aanval op die vlug geslaan. Die ma het op die toneel aan haar wonde beswyk.
“Die polisie het onmiddellik met hul ondersoek na die moord begin, maar namate die ondersoek gevorder het, het alle vingers na die dogter gewys,” sê Hlubi. “Danksy briljante werk deur polisiebeamptes wat hulle aan die saak toegewy het, is die dogter Dinsdag by die Bloemspruit-polisiestasie in hegtenis geneem.”
Die vrou sal binnekort in die Bloemspruit-landdroshof verskyn.
Die name van die beskuldigde en die oorledene kan eers bekendgemaak word nadat die vrou in die hof verskyn het.
Dit is skokkend? Wat is besig om in die wereld te gebeur?
Is ons verbaas, word hierdie dinge wat deesdae gebeur nie reeds in ons bybel gese dat dit sal gebeur nie?