Doodskis-saak: Beskuldigdes is spyt

Buite die Middelburg-hooggeregshof (23 Oktober 2017) Foto: Maroela Media/Landi Slatter

Theo Martins Jackson (29) en Willem Oosthuyzen (28), wat in Augustus in die Middelburg-hooggeregshof skuldig bevind is op verskeie aanklagte in die opspraakwekkende doodskis-saak, word later die week gevonnis.

Die staat het tydens die verhoor aangevoer dat Jackson en Oosthuyzen vir Victor Mlotshwa aangerand het voordat hulle hom in ‘n doodskis ingedwing het. Die staat het ook aangevoer die mans het vir Delton Sithole aangerand. Die beskuldigdes het dit egter ontken en gesê hoewel hulle Mlotshwa in die kis ingedwing het, wou hulle hom net skrikmaak en hulle het nie bedoel om hom leed aan te doen nie.

Die verrigtinge het begin met ʼn redekawel oor die verdediging se eerste getuie. Regter Sheila Mphahlele het toe gelas dat die getuie, ʼn maatskaplike werker, nie geïdentifiseer mag word nie en daar ook nie beeldmateriaal van haar geneem mag word nie.

Die hof het vlugtig verdaag en hervat waarna die maatskaplike werker begin getuig het. Sy het 31 jaar ervaring en is ook as ʼn korrektiewe beampte geregistreer. Sy het ter strafversagting vir Oosthuyzen en Jackson getuig.

Sy het onder meer getuig dat Oosthuyzen nie meer op die plaas, waar hy werksaam was, kon aanbly nie en hy, sy vrou en hul klein kinders bly nou by sy skoonouers. “Hy verkoop nou vrugte en groente vir ʼn inkomste, maar sy inkomste is nie vas nie en verskil elke maand.”

Sy het verder genoem Oosthuyzen is ʼn eerste oortreder, hy is die broodwinner vir sy gesin en hy moet sy vrou en klein kinders ondersteun. “Sy vrou is ook werkloos en gebruik slaappille.” Volgens haar verslag was daar nog nooit enige klagte van rassisme teen hom nie. Sy het bygevoeg dat sy kinders skeidingsangs ervaar.

Oosthuyzen het self volgende getuig en gesê hy is spyt dat hulle vir Mlotshwa in die kis ingedwing en hom nie eerder na ʼn polisiestasie geneem het nie.

Die maatskaplike werker het, met verwysing na Jackson, gesê dat hy en die res van sy gesin fisies en verbaal deur sy pa wat glo alkohol misbruik het, mishandel is en dat hulle gereeld nie kos in die huis gehad het om te eet nie. Hy het gr. 9 gedruip omdat sy ouers nie die skoolfonds kon betaal nie en hy het dus nie voltyds skoolgegaan nie.

Willem Oosthuyzen (voor) en Theo Martins Jackson in die hof (Augustus 2017) Foto: Landi Slatter

Hy is volgens haar ook die primêre bron van inkomste vir sy gesin en hy ondersteun ook sy fisiek gestremde pa. Sy het verder aangedui dat hy ook ʼn eerste oortreder is en ʼn vrou en kinders het om te ondersteun. Sy vrou werk tans maar daar is, volgens haar, net R108 van haar salaris oor ná aftrekkings.

Sy het bygevoeg beide beskuldigdes het hulself aan die polisie oorgegee en het die langer weergawe van die video aan die hof beskikbaar gestel. “As hulle nie verantwoordelikheid vir hulle aksies wou aanvaar nie, sou hulle nooit skuld beken het op sekere feite nie. Nie een van hulle het ʼn geskiedenis van soortgelyke gedrag nie, hulle het ondersteuningsnetwerke wat hulle kan bystaan en sal kan rehabiliteer en weer in die samelewing geïntegreer word.”

Sy het die hof versoek dat, indien die mans tronkstraf opgelê sou word, hulle na ‘n gevangenis in Witbank gestuur word, eerder as in Middelburg. Sy het verder eerder korrektiewe toesig en gemeenskapsdiens vir die beskuldigdes voorgestel. Jackson het tydens sy getuienis gesê hy is spyt oor wat gebeur het.

Mlotshwa se ma was baie emosioneel tydens sy getuienis en die hof moes vir ʼn wyle verdaag. Hy het getuig dat hy sielkundige behandeling gekry het. Adv. Org Basson, namens Jackson, het dit egter aan Mlotshwa gestel dat hy nie regtig berading ontvang het nie.

Mlotshwa meen Jackson en Oosthuyzen moet tot minstens 15 jaar tronkstraf gevonnis word. Dit het ook aan die lig gekom dat Mlotshwa R400 000 in ‘n siviele hofgeding van Oosthuyzen en Jackson eis.

Oosthuyzen en Jackson word Vrydag gevonnis.

Lees alle vorige berigte oor die doodskis-video op Maroela Media.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

28 Kommentare

jongste oudste gewildste
Alida

Hulle soek net geld. Hy het niks oorgekom nie en is nie beseer nie. Smyt die saak uit die hof uit.

Andrea

Ja, hul is spyt. En die plaasmoordenaars? Hul is nie spyt en saam met die regering is dit maar ok so. Wat n siek land leef ons nie in nie! Histerie oor n dom streep wat tien teen een uit desperaatheid getrek is, maar niks word gesê of gedoen oor al die moord en misdaad nie!

Mel

Hele sirkus spel hierdie, genade daar is erger meer traumatiese sake as die doodskis sepie, rerig waar!!!!

Izolde

15 jaar vir ‘n skrikmaakaksie. Liewe aarde hoekom dan nie maar die doodstraf terugbring vir moordenaars nie. Moordenaars kry tussen 15 en 25 jaar. Dis absurd. Hy skrik hom dood omdat hy agterkom hy pas waaragtig in ‘n kis en nou ly hy aan trauma. Dit het seker nou eers ingesink hoe lank hy in daardie beknopte spasie gaan lê as hy regtig dood is.

Watte

Ek gaan voortaan ‘n klomp watte met my saamdra dat sou ek dit nodig kry dan kan ek daardie een in watte toedraai en op dit skryf ‘Breekbaar. Hanteer versigtig. Moenie stamp nie, nie in die son los, nie koud laat word.” Natuurlik moet die regte kant ook na BO gehou word!