Die misdaadtoneel in Pretoria. Foto: Twitter
ʼn Dramatiese toneel het Vrydagmiddag in die Pretoria sakesentrum afgespeel toe drie gewapende rowers die Protea Towers binnegegaan en verskeie mense beroof het.
Kapt. Tsekiso Mofokeng, woordvoerder van die polisie, het gesê die rowers het omstreeks 14:20 die gebou bestorm. ʼn Voorlopige ondersoek dui daarop dat verskeie mense in die gebou beroof is, terwyl ander uitgehardloop het om hulp te ontbied. “Van die mense het in die Capitec-bank oorkant die straat in gehardloop en die polisie is ontbied,” het hy gesê.
Die misdaadtoneel in Pretoria. Foto: Twitter/SAPD
Talle polisiebeamptes was binne minute op die toneel en die kantoorgebou is met behulp van die honde-eenheid deursoek. Niemand is in hegtenis geneem nie, maar ʼn 28-jarige man wat vermoedelik een van die rowers is, is na die polisiestasie geneem vir ondervraging.
Mofokeng het gesê gerugte wat wyd op sosiale media versprei is dat ʼn bank beroof en mense gyselaar gehou is, is onwaar. “In die stadium is die inligting nog skraps en daarom doen die polisie ʼn beroep op die mense wat ten tyde van die rooftog in die gebou was, om na vore te kom om die polisie met ons ondersoek by te staan,” het hy gesê.
Volgens Mofokeng is hulle nie sover bewus van enige beserings wat aangemeld is nie. ʼn Saak van sakeroof is aanhangig gemaak.
