Drie betrap met beskermde plante

(Foto: Verskaf)

Drie verdagtes is Sondag in Steinkopf in die Noord-Kaap in hegtenis geneem nadat beskermde plante ter waarde van derduisende rande in hul besit gevind is.

Lede van die Springbok-veediefstal en bedreigdespesie-eenheid onder aanvoering van kapt. Karel du Toit het Sondag twee verdagtes in hegtenis geneem nadat hulle met meer as 3 000 vetplante ter waarde van R400 000 betrap is.

Die twee verdagtes, 25 en 27 jaar oud, is ook met behulp van die Namakwa-misdaadintelligensie- en die Springbok-honde-eenheid vasgetrek.

In ʼn afsonderlike geval is ʼn 35-jarige man ook Sondag in Steinkopf in hegtenis geneem. Hy is betrap met vetplante ter waarde van R100 000.

Die drie verdagtes sal na verwagting vandag in die Springbok-landdroshof verskyn op aanklag van die onwettige besit van beskermde plante.

Genl.maj. Henriette de Waal, waarnemende provinsiale kommissaris in die Noord-Kaap, het die betrokke lede geloof vir hul optrede wat gelei het tot die geslaagde inhegtenisneming van die verdagtes.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.