Argieffoto: NSRI
Twee seuns en ʼn meisie het Sondagmiddag by Diasstrand in Mosselbaai in die Wes-Kaap verdrink.
Craig Lambinon, woordvoerder van die Nasionale Seereddingsinstituut (NSRI), het gesê die NSRI het omstreeks 14:30 tyding ontvang dat ʼn verdrinking besig is om plaas te vind. Lewensredders en ʼn reddingsboot van die NSRI, die polisie en verskeie nooddienste is na die toneel ontbied.
“Die drie kinders, sowat 14 jaar oud, is almal maats van Mosselbaai,” het Lambinon gesê. “Hulle is deur ʼn sterk seestroom meegesleur terwyl hulle geswem het.”
ʼn Onbekende vrou het die meisie uit die water gered en noodhulp begin toepas. Paramedici het die meisie op die toneel dood verklaar.
“Die polisie het die seuns se liggame in die water opgespoor. Hulle was reeds dood.”
Die kinders se familie wat op die toneel was, is deur die polisie se beraders bygestaan. Die polisie doen ʼn geregtelike doodsondersoek.
