Drie sterf toe bakkie, trein bots

Jesse Isemonger (21), Tersia van der Merwe (22) en Sarah Niewoudt (24) (Foto: Geloftefees De Kuile, Facebook)

Drie mense is Sondag naby Lime Acres in die Noord-Kaap dood toe hul bakkie voor ŉ aankomende trein beland het.

Kapt. Sergio Kock, polisiewoordvoerder, sê die ongeluk het omstreeks 12:00 by die Arriesfontein-treinoorgang, sowat 40 km buite Lime Acres, plaasgevind.

“Daar word beweer dat die bakkie die treinspoor wou oorsteek toe dit deur die aankomende trein getref is,” sê Kock.

Hy sê die bestuurder van die bakkie, Jesse Isemonger (21), en twee insittendes, Tersia van der Merwe (22) en Sarah Nieuwoudt (24), is op die toneel dood verklaar.

“Die polisie ondersoek nog die voorval en enigiemand met meer inligting kan sers. Nicholas Dube by 079 878 3879 kontak.”

Op sosiale media het huldeblyke vir die drie slagoffers ingestroom.

Tersia se ma, Marlize van der Merwe, het op Facebook geskryf sy is hartgebroke nadat haar geliefde dogter van haar weggeskeur is.

“Here my God… Ek loof en prys U vir haar lewe… Ek dank U vir die groot voorreg om haar ma te kon wees, ŉ ongelooflike voorreg,” skryf Van der Merwe.

“Dierbare Sarah, so vinnig is jy weg. Ons in die Kalahari treur oor jou en is verslae. Jy was besonders, jou voetspore oral te sien. Jy het so ’n mooi lewe gelei,” skryf Marietjie Barnard oor Sarah se dood.

“Ons het nie woorde nie. Ons koester die mooi herinneringe wat Jesse agterlaat. Ja, Jesse het voluit gelewe… Ons gaan hom baie mis”, skryf Christo Pieterse oor Jesse.