Drie van US bedank ná verslag oor rektor

adv-jan-heunis

Adv. Jan Heunis. Foto: Youtube.com.

Drie lede van die konvokasie van die Universiteit Stellenbosch (US) het bedank.

Dr. Jan Heunis, president van die konvokasie, Bernard Pieters, sekretaris van die konvokasie, en Daleen van Zyl, ʼn bykomende lid van die konvokasie se uitvoerende bestuur, het hul bedankings aangekondig.

Heunis het in sy bedankingsbrief aangevoer die US is in oneer gebring en dat hy nie langer kans sien om met die instelling verbind te word nie.

Dit volg nadat ʼn ondersoek na prof. Wim de Villiers, rektor en visekanselier van die US, hom van enige blaam onthef het.

Daar is beweer dat De Villiers op ʼn onvanpaste wyse probeer het om vir regter Edwin Cameron van die Konstitusionele Hof te oortuig om die universiteit se nuwe kanselier te word terwyl Cameron die hofsaak teen die US se taalbeleid om Afrikaans prakties af te skaf, aangehoor het.

Volgens Heunis is daar ʼn eeueoue regsbeginsel in beskaafde lande dat ’n voorsittende regterlike beampte nie met ’n party tot die saak wat voor hom of haar dien, kontak mag hê voordat die saak afgehandel is nie. “Dit het in Suid-Afrika ook gegeld. Maar voordat regter Cameron die hof se uitspraak gelewer het, was die rektor, met die voorsitter se medewete, telefonies en by wyse van e-posse met Cameron in verbinding om hom die kanselierskap van die US aan te bied.”

Prof. Wim de Villiers. Foto: US

“Dit is wêreldwyd by meeste universiteite van naam ook gevestigde tradisie dat ’n dienende rektor nie inmeng met die aanwysing van ’n kanselier nie. Die logika is duidelik. Sou die rektor se keuse nie as kanselier aangewys word nie, sou dit ’n feitlik onhoudbare verhouding tussen die kanselier en rektor veroorsaak.”

Daarbenewens was daar ook nadat die saak aangehoor en voordat ’n uitspraak gelewer is, ’n hele paar keer skakeling asook ’n persoonlike ontmoeting tussen die twee, aldus Heunis.

“Nie ’n deursigtige reddingspoging deur ’n regter wat deur die US self aangestel is, of die aanvaarding deur die raad van sy ooglopend gebrekkige verslag, kan hierdie onverkwiklike kontak regverdig nie.

“Dit kan nie met enige aanspraak op geloofwaardigheid betwis word dat hierdie gebeure, tesame met die feit dat Cameron se uitspraak ten gunste van die US waarskynlik uit ’n regsoogpunt sy swakste ooit is, die persepsie skep dat hy die US ter wille wou wees en was nie.”

Heunis het gesê hoewel De Villiers die hoop uitgespreek het dat die sage nou tot ’n einde gekom het, sal dié hoop beskaam. “Nie alleen omdat die skaduwee daarvan wyd en swaar oor die US sal hang nie, maar ook omdat die hoofregter en die waarnemende hoofregter se hantering van die saak tot dusver veel te wense oorgelaat het en nou dreig om by te dra tot die verwatering van Suid-Afrika se regstaat-status.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

26 Kommentare

jongste oudste gewildste
Louis

Saluut!!! Ek eer julle standpunt om nie met drek om te gaan nie of met dit geassosieer te word nie. Meer van julle nodig.

Francois

Ek is ‘n alumnus van die US. Ek distansieer my al geruime tyd van my alma mater en het ook alle finansiële ondersteuning van die US gestaak. Die US se versaking van Afrikaans as onderrigtaal en hul blatante omarming van Anglo-Afrosentrisme stuit my teen die bors. Ek voorsien dat die US binne enkele dekades (indien nie gouer nie) maar net nog ‘n derderangse derdewêreld universiteit sal wees.

Vaalseun

Baie dankie, Jan, Bernard en Daleen, en die res van die Konvokasie wat julle ondersteun het. Julle het meer as julle deel gedoen vir die toekoms van die US. Ons stel julle leiding en opoffering hoog op prys.

marous

Vrot ta “Maties”

Saint

Hier is twee sake.
n Bedanking weens verskil met.besluit maak rad tegelyk swakker vanweë bedanking en sterker deur nuwe “yes-man” aanstelling.
Die bedanker kan nou by ander instansie aansluit waar hul sienings ooreenkom en dan daar n sterker invloed uitoefen.
Dit is bekend dat organisasies deur drie fases gaan nl
Ontstaan en bewusmaking
Geweldige groei gevolg deur konsolidering en dan
Vervl omdat nuwe elemente die stigtingsvoorwaarde verwater.