Drie vas ná Tarkastad-plaasmoord

Argieffoto

Drie verdagtes is in hegtenis geneem in verband met die moord op die 87-jarige Lettie Rupping.

“Twee verdagtes is Maandag in Tarkastad aangekeer en ʼn derde verdagte is Maandagaand omstreeks 19:00 by sy huis in hegtenis geneem,” het kol. Sibongile Soci, in ʼn verklaring gesê. Die verdagtes is tussen 29 en 42 jaar oud.

Rupping se liggaam is Maandag omstreeks 08:00 in Whittlesea naby die pad tussen Mbekweni en Oxton aangetref.

“Die oorledene se persoonlike besittings insluitend ʼn vuurwapen en debietkaarte was in die verdagtes se besit,” het Soci bygevoeg.

Ian Cameron, AfriForum se hoof van gemeenskapsveiligheid, het Dinsdag aan Maroela Media gesê Rupping is Sondag omstreeks 12:00 ontvoer.

“Die verdagtes het haar na Queenstown geneem en omstreeks 00:00 kontant uit haar rekening getrek,” het Cameron gesê. Rupping het vermoedelik toe nog geleef sodat hulle haar PIN-kode kon bekom. “Hulle het haar op pad terug na Tarkastad doodgeskiet.”

Rupping is vermoedelik deur vier mans oorval. Die vierde persoon was na bewering een van haar werknemers voordat sy hom weens skaapdiefstal afgedank het.

“Die werknemers het Maandagoggend onraad vermoed omdat hulle haar bril by die plaashek opgespoor het,” het Cameron bygevoeg.

Die verdagtes sal binnekort in die Tarkastad-landdroshof verskyn op aanklag van moord, huisroof en motordiefstal.

Lees ook:
87-jarige van Oos-Kaap dood aangetref