Drie vas oor Amy-Leigh se ontvoering

Amy-Leigh de Jager (Foto: Facebook)

Die polisie het twee vroue en ʼn man in hegtenis geneem in verband met die ontvoering van die sesjarige Amy-Leigh de Jager.

Amy-Leigh is Maandag voor haar skool, Laerskool Kollegepark, uit haar ma se arms gegryp en ontvoer. Sy is die volgende oggend ongedeerd gevind.

Volgens brig. Vishnu Naidoo, woordvoerder van die polisie, is die drie verdagtes gisteraand by hul huise in Vanderbijlpark in hegtenis geneem. Twee vroue, 27 en 40 jaar oud, en ʼn 50-jarige man is deur lede van die polisie se eenheid vir gesinsgeweld, kinderbeskerming en seksuele misdrywe in hegtenis geneem.

Naidoo het gesê een van die vroue wat in hegtenis geneem is, is bekend aan Amy-Leigh se familie. Die drie verdagtes is tans in aanhouding en sal na verwagting môre in die Vanderbijlpark-landdroshof verskyn.

“Ek prys die onwrikbare verbintenis wat die ondersoekers en lede van misdaadintelligensie in hierdie saak getoon het,” het genl. Khehla John Sitole, nasionale polisiekommissaris, gesê. “Hierdie lede het onverpoosd gewerk sedert Amy-Leigh se ontvoering aan ons gerapporteer is en sulke toewyding is baie bemoedigend.”

Volgens Naidoo is die polisie seker dat hulle die drie hoofverdagtes in die saak in hegtenis geneem het en kan die inhegtenisneming van nog verdagtes nie uitgesluit word nie.

Daar is vroeër berig dat vier mans Maandag omstreeks 08:00 met klein Amy-Leigh in ʼn wit Fortuner weggejaag het. ʼn Grootskaalse ondersoek is binne minute ná die voorval van stapel gestuur.

Die polisie het Dinsdag in die vroeë oggendure bekend gemaak dat die dogtertjie ongedeerd gevind is. Sy het ook ʼn mediese ondersoek ondergaan.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

137 Kommentare

jongste oudste gewildste
Nel

Ek stem saam genl. Sithole, baie geluk -dit was puik speurwerk. As julle so kan volhou is daar voorkant toe lig in die tonnel vir die SAPD.

Joe

en dié is nog net die begin, die volle waarheid gaan nog uitkom.

Andre

Great werk deur die SAPD… darm nie net altyd negatief nie

Wonder maar net!

Dankie SAPD En laat geregtigheid seëvier!

Johann

Wees waaksaam oor wie jy jou kinders mee toe vertrou. TRUST NO ONE…veral nie die wat jou kom en gaan ken nie. Maak hulle self af as betroubaar, en dan slaan die ware kleure deur.