Drie verdagtes is agter tralies vir beweerde tenderongerymdhede ten bedrae van sowat R100 miljoen by die St. Lucia-munisipaliteit in KwaZulu-Natal.
Nokuthula Lafuleni-Zungu, ʼn boukapasiteitsbestuurder by die iSimangaliso-vleilandpark, Caiphus Khumalo, ʼn direkteur by die park, asook Nkosinathi Victor Ntshangase, ʼn vriend van Lafuleni-Zungu en ʼn wildbewaarder by Isimangaliso, is tydens ʼn lokval in hegtenis geneem.
Brig. Vishnu Naidoo, nasionale polisiewoordvoerder, sê die drie verdagtes het glo geld van verskeie diensverskaffers geëis wat werk vir die St. Lucia-munisipaliteit doen.
Die voorlopige polisieondersoek het vasgestel dat die geld betaal is in rekeninge wat met minstens al drie verdagtes verbind word. Nog inhegtenisnemings word boonop binnekort verwag.
Lafuleni-Zungu, Khumalo en Ntshangase het Dinsdag in die Empangeni-landdroshof verskyn en staan tereg op aanklagte wat verband hou met onder meer tenderongerymdhede, bedrog, korrupsie, diefstal en rampokkery.
Hul aansoeke om borgtog sal op 29 Desember aangehoor word.