Dringende hof laat Eskom toe om krag te sny

Argieffoto: GCIS

Argieffoto: GCIS

AfriForum en AfriSake het vandag hul teleurstelling uitgespreek nadat die hooggeregshof beslis het Eskom mag die kragtoevoer na munisipaliteite, wat versuim om hul Eskom-rekeninge te betaal, sny.

Eskom het oor die Kersseisoen sy planne aangekondig om kragtoevoer na inwoners van verskeie munisipaliteite in die Noord-Kaap, Noordwes en Vrystaat af te sny omdat sekere munisipaliteite versuim het om gelde, wat vir elektrisiteitsverskaffing van inwoners ingevorder is, aan Eskom oor te betaal. Hierdie munisipaliteite skuld Eskom miljarde rande se elektrisiteitsgelde.

Die hof het gedurende die dringende aansoek argumente aangeraak wat AfriForum en AfriSake voorberei het vir die hoof-hofaansoek op 22 Maart 2017. Vandag se uitspraak dui daardie argumente het nie geslaag nie en beide organisasies sal moet oorweeg of hulle wel nog kan voortgaan met die hoofaansoek en of die aansoek laat vaar gaan word.

Volgens Marcus Pawson, hoof van plaaslike regering en omgewingsake van AfriForum, bly hulle van mening dat Eskom, as ʼn staatsbeheerde maatskappy, ander regsmiddele tot sy beskikking het om sy tariewe in te vorder. “Om betalende en wetsgehoorsame inwoners en instansies te straf vir die nalatigheid van onbekwame munisipale administrasies maak nie sin nie. Die benadering van Eskom, om te dreig met summiere kragafsluitings van volledige munisipale gebiede, bly ʼn drakoniese en ongrondwetlike maatreël, wat neerkom op kollektiewe benadeling van betalers, sowel as wanbetalers.”

Volgens Pawson is elektrisiteit geklassifiseer as ʼn noodsaaklike diens en word betalende dienstegebruikers, ouetehuise, hospitale, skole en nooddienste benadeel weens die kultuur van wanbetaling onder sekere inwoners en die wanbestuur van munisipaliteite deur onbekwame amptenare.

“Munisipaliteite, tesame met die provinsies en nasionale regering, moet hulle verantwoordelikhede nakom teenoor Eskom. Ons het simpatie met Eskom en sy frustrasies met munisipale amptenare, maar terselfdertyd kan Eskom nie munisipaliteite alleenlik verantwoordelik hou vir sy finansiële situasie, terwyl Soweto alleen soortgelyke skuld het as die top tien agterstallige munisipaliteite nie. Vrae moet gevra word oor waarom verafgeleë plekke gestraf word en nie Soweto nie?” sê Pawson.

Die munisipaliteite is Kamiesberg (Garies, Hondeklipbaai en Kamieskroon), Thembelihle (Hopetown en Strydenburg), Moqhaka (Kroonstad, Steynsrus en Viljoenskroon), Masilonyana (Brandfort, Theunissen, Verkeerdevlei en Winburg), Nketoana (Reitz, Lindley en Petrus Steyn), Mantsopa (Excelsior, Ladybrand en Tweespruit), Tokologo (Boshof en Dealesville), Nala (Bothaville en Wesselsbron) en Dihlabeng (Bethlehem, Paul Roux en Rosendal).

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

39 Kommentare

jongste oudste gewildste
Ansie

Wel ek is seker dat ons as betalers die munisipaliteit kan dagvaar. As jy jou krag betaal het mag die krag nie afgesny word nie. Die munisipaliteit is dus verantwoordelik om te sien dat jy krag het.

Ww

Hierdie uitspraak dui vir my daarop dat tot die regters onder steun korrupsie en wat alles daarmee saam gaan. Om eerlike mense te straf en selfs skade aan te doen spreek vanself

Kobus

Soos met n staking van geen werk,geen betaling….is dit hier net die teenoorgestelde….wie sy krag op datum betaal of van vooraf betaalde metode gebruik maak…DIE SE KRAGTOEVOER MOET GESNY WORD….maar die wat alles besteel en onwettig krag koppel voel n veer…want sodra daar relings met Eskom getref sou word…STEEL ONS MAAR NET VERDER….ek so moeg vir ons mooi land se ellende wat net vererger elke dag…wanneer sal daar werklike LIG wees.

Kobus

Nie noodwendig ‘n slegte uitspraak nie. Die inwoners kan nou ‘n belastingbetalers vereniging stig wat self hul krag by Eskom koop. So kan hul ook hul eie plaaslike belastings in hul eie areas aanwend om infrastruktuur in stand te hou. Geen hof kan hul nou meer aanvat as hul belastings kanaliseer na ‘n apparte liggaam wat hul gebied bestuur nie.

CSA

Is Ngwathe nou nie deel meer van die munisipaliteite nie? Op vorige berig was hulle in?