Dringende hofbevel teen grondbesetters bekom

Dr. Motodi Maserumule (derde van links) saam met die span van AfriForum buite die hof nadat die dringende hofbevel bekom is. Foto: Verskaf

Die burgerregte-organisasie AfriForum het Vrydag ’n dringende aansoek in die hooggeregshof in Pretoria bekom teen onwettige plakkers op ’n grondeienaar se plaas net buite die stad.

Ian Cameron, AfriForum se hoof van gemeenskapsveiligheid, het aan Maroela Media gesê dié bevel sal nou aan die grondbesetters en die SAPD beteken word, waarna die polisie verplig sal wees om die balju by te staan om die onwettige plakkers van die grond te verwyder.

Volgens Cameron het die probleem reeds Maandag begin toe ʼn groep van ongeveer 150 mense by dr. Motodi Maserumule se plaas, naby Soshanguve, opgedaag het. Cameron sê die besetters het vinnig ʼn sinkhuisie met die woord “office” daarop opgerig, en begin om “erwe” op die plaas teen R500 stuk te verkoop.

Cameron beweer aanvanklike pogings om ʼn saak by die polisie aanhangig te maak was onsuksesvol, maar Maserumule kon uiteindelik Woensdag met AfriForum se hulp daarin slaag om ʼn saak van betreding by die polisie aanhangig te maak.

Mense staan in ‘n ry om glo vir hulle ‘n “erf” op die plaas te koop. Foto: Verskaf

Nadat die saak aanhangig gemaak is, het AfriForum die hof genader om ʼn bevel te bekom om die besetters te dwing om die plaas te ontruim. Cameron sê daar is tans reeds minstens 30 strukture deur die besetters op die grond opgeslaan en die verkoop van die sogenaamde “erwe” gaan steeds voort.

“Die polisie het tot dusver geskitter in hul afwesigheid om Maserumule se eiendomsreg te beskerm,” het Cameron gesê.

Hy sê Maserumule het beplan om ʼn gedeelte van die grond vir ʼn boerdery te gebruik, terwyl die ander gedeelte ontwikkel sal word. Maserumule bly nie tans op die plaas nie. Volgens Cameron is die huis op die plaas reeds vroeër al heeltemal deur plakkers geplunder.

“Ingevolge hierdie hofbevel moet die besetters onmiddellik van die grond af beweeg en die polisie teen hulle optree indien hulle dit nie doen nie,” sê Cameron. “Grondeienaars moet onmiddellik betredingsake by die polisie aanhangig maak indien hul eiendom beset word. Dit is ’n mite dat grondeienaars eers die hof moet nader.”

Die polisie kon nie onmiddellik vir kommentaar bereik word nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

28 Kommentare

jongste oudste gewildste
Her

Die regering sal nog aan n plan kom om swart plaaseienaars immuniteit teen besetting te gee. Dis wit en dis al.

Chris Ws

AfriForum moet die minister van polisie dagvaar vir versuim van pligte.Hy sien NIE toe dat sy polisielede hul werk doen nie.Voorts moet die bevelvoerder van daai betrokke polisiestasie ook voor stok gekry word vir die versuim van sy pligte.Dis nonsens dat SAP lede einde van die maand salarisse betaal word maar versuim om hul werk te doen.

Paul

Wat ‘n absolute skande is, is dat AfriForum ‘n hofbevel moes bekom om die polisie te dwing om op te tree.

Paul

Cyril Ramaphosa sal nou vir ons beduie hy is nie slegs ‘n Afrika Demokraat nie, maar hy is ook ‘n Afrika Tegnokraat, alhoewel hy ook ‘n sosialis is en dan is hy ‘n kapitalis van nature.

Dan Stephen Friedman van Johannesburg universiteit sê mos vanoggend in ‘n artikel op Netwerk24 dat Trump se twiet het weinig met grond te doen, maar eintlik met wit vrees.

IK

‘Polisie’? Wie of wat is dit?