Dringende soektog na maanhaarjakkalsies

Maanhaarjakkalsies Foto: Funny Wildlife, Tumblr

Maanhaarjakkalsies Foto: Funny Wildlife, Tumblr

Die FreeMe-rehabilitasiesentrum is dringend op soek na ʼn groep maanhaarjakkalskleintjies nadat hul ma Vrydagaand op die N10, ongeveer 30 km buite Cradock, in die Oos-Kaap doodgery is.

“ʼn Motoris het die maanhaarjakkals omgery en sy vrou in Krugersdorp gebel,” het Penny Morkel, dierekliniekbestuurder by FreeMe, Saterdag aan Maroela Media verduidelik. “Sy het ons dadelik gekontak, maar teen daardie stadium was dit reeds ʼn geruime tyd nadat die ongeluk gebeur het. Die motoris kon nie vir ons GPS-koördinate verskaf van waar die ongeluk plaasgevind het nie, en omdat dit donker was, kon hy ook nie enige landmerke uitken nie.”

Volgens Morkel was die wyfie aan die linkerkant van die pad, in die rigting van Middelburg.

Die wyfie was besig om te soog, so haar kleintjies moet in die omgewing wees. “Hulle sal nie vir langer as ʼn paar dae sonder haar oorleef nie,” het Morkel benadruk. “Indien haar oorskot nie meer op die toneel is nie, behoort daar nog steeds bloed te wees. Al het iemand dalk net in die gebied verbygery en gedink dit is dalk ʼn hond wat doodgery is.”

Sy het verduidelik indien iemand net ʼn aanduiding kan gee waar die ongeluk plaasgevind het, kan hulle moontlik in daardie gebied na die kleintjies soek, omdat hulle weet hoe groot gebied die maanhaarjakkalse gewoonlik gebruik.

Kontak asseblief vir Penny Morkel van FreeMe-rehabilitasiesentrum indien jy verdere besonderhede het. Skakel 083 602 1606.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

3 Kommentare

CHRISTA ·

Ek hoop hulle word GOU gevind en dat hulle ongedeerd sal wees!!

Het jy iets op die hart? Maroela Media se kommentaarfunksie is ongelukkig gesluit oor die Paasnaweek. Kom kuier gerus later weer!

Nuuswenke kan deur hierdie vorm gestuur word.