‘Dronk motoris’ ry glo 2 polisiebeamptes dood

(Foto: SA Polisie)

Twee polisiebeamptes is Vrydagaand in Deneysville in die Vrystaat dood nadat hulle glo deur ʼn dronk motoris raakgery is.

Die twee beamptes, ʼn adjudant-offisier en ʼn sersant, was omstreeks 20:15 aan diens en was besig om ʼn vragmotor op die R594 te ondersoek ingevolge die afsonderingsregulasies toe hulle doodgery is.

Volgens brig. Vishnu Naidoo, nasionale polisiewoordvoerder, het die bestuurder van ʼn bakkie die twee beamptes raakgery ondanks die feit dat hulle glimbaadjies aangehad het. Naidoo het gesê die motoris was vermoedelik erg onder die invloed van alkohol.

“Die bakkiebestuurder is in aanhouding en hy sal na verwagting aangekla word van strafbare manslag, bestuur onder die invloed van alkohol sowel as die oortreding van die regulasies van die Rampbestuurwet aangesien hy nie aan die aandklokreël voldoen het nie.”

Lt.genl. Khehla John Sitole, nasionale polisiekommissaris, het sy skok oor die voorval uitgespreek.

“Die ontydige heengaan van ons twee kollegas is inderdaad ’n bitter pil om te sluk. Ons vertrou dat die man wat na bewering verantwoordelik is vir hul dood en wat tans agter tralies is, gepas gestraf sal word indien hy skuldig bevind word,” het Sitole gesê.

Die nasionale polisiekommissaris het sy medelye met die families van die beamptes betuig en die provinsiale polisiekommissaris versoek om die nodige ondersteuning aan die families te gee.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

31 Kommentare

jongste oudste gewildste
SomeOne

en dan wil die mense drankverkope he, kyk wat gebeur, dis nie die enigste geval nie, dink maar aan in die tye voor die “lock-down” daar was

'n Simpelman

Simpatie met hul families. ‘n Bewys dat alkohol verban moet bly.

Scalla

Innige simpatie met die twee se familie, drink sal hul drink, net baie duurder op swart mark, staat verloor miljoene tax.

Rooivalk

Dis nie die drank wat hulle doodgery het nie.

Annette

Stem saam met jou Wit Willem. Dis mens wat nie hulle perke ken nie wat sulke lelike ongelukke veroorsaak.