DStv verwyder 3 gewilde kanale

DStv (Foto verskaf)

DStv het bevestig dat drie gewilde kanale einde vandeesmaand nie meer beskikbaar sal wees nie.

Die History-, Crime + Investigation- en Lifetime-kanale sal teen die einde van die dag op 31 Oktober nie meer op DStv beskikbaar wees nie. Volgens Nthabiseng Motsei, ʼn woordvoerder vir DStv, het bevestig die kontrak met die verskaffer van dié kanale verstryk op 1 November.

“Dit is deel van ons volgehoue pogings om ons inhoudskedule vars te hou en om die reeks kanale wat aangebied word, te optimaliseer. Kykers sal egter kan voortgaan om ’n paar van hul gunstelinge soos die Housewives-franchise te geniet aangesien dit reeds op 1Magic beskikbaar is.”

Volgens Motsei sal DStv binnekort twee nuwe kanale bekend stel. “Die eerste is ’n gevestigde globale handelsmerk en die ander ’n nuwe innoverende handelsmerk.

“Albei kanale sal opwindende nuwe titels en genres meebring wat kykers regtig sal kan geniet, waaronder topgehalte dokumentêre, geskiedenis- en feitelike realiteitsprogramme.”

DStv gaan ook voort om sy aansienlike belegging in plaaslike reekse en inhoud te vergroot, aangesien dit volgens hom groot aftrek by kykers kry en tot kykerbetrokkenheid lei.

“Ons hersien voortdurend die opset van ons inhoud en kanaalkeuses om ons vermaakaanbod aan ons klante te verbeter, en ook om te verseker dat klante steeds goeie waarde kry. Hierdie proses sluit deurlopende skakeling met verskillende inhoudsvennote in om te verseker dat ons meer boeiende inhoudaanbiedinge vir klante kan bied.”

(Argieffoto: kykNET)

Maroela Media het vroeër berig talle kykNET-kykers is die josie in omdat die prys van die goedkoopste DStv-pakket waarop dié Afrikaanse kanaal voortaan beskikbaar gaan wees, bykans verdubbel.

DStv doen ná 29 Oktober weg met sy Select-pakkette. Dit het toegang tot kykNET ingesluit en het intekenare R265 per maand gekos.

Die Compact Plus-pakket sal voortaan die goedkoopste opsie vir kykNET-kykers wees, maar die prys daarvan is R519 per maand – héélwat meer as wat intekenare vantevore betaal het.

Compact Plus is die tweede duurste opsie vir intekenare, met net die Premium-pakket wat kykers meer uit die sak jaag. kykNET is nét op dié twee platforms beskikbaar.

Voormalige Select-intekenare word outomaties na die Family-pakket gemigreer. Intekening beloop steeds R265 per maand. Op dié pakket het intekenare toegang tot kykNET & kie en kykNET NOU (maar nie tot kykNET nie).

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

152 Kommentare

jongste oudste gewildste
Carmi

Ons kyk nie daai housewives sneet nie en ook noks op daai magic kanaal nie !!! Ons het mestal History en Discovery gekyk , ag nee wat mens gaan maar Dstv moet kanseleer

Lee

Good grief!!! En ons gaan nogsteeds dieselfde moet betaal per maand nadat daar al heelwat kanale weggevat is. Tyd om DSTV te groet. In elk geval elke damn dag net repeats van ou programme. Gaan maar eerder die boksie roete met Netflix en als

Penellope Jones

Hoekom die History-kanaal? Immers is die insiggewend, interessant en opbouend. . . .

Gert

Benoude katte maak benoude spronge .

SDR

Tyd vir DapperMedia om die gaping te vul. DapperMedia gaan nog groot word….