Duisende laat hul stem hoor teen plaasaanvalle

Argieffoto: Lorraine Claasen

Die DA sê hy het duisende handtekeninge ontvang van bekommerde landsburgers wat daarop aandring dat pres. Cyril Ramaphosa onmiddellik moet optree om plattelandse gemeenskappe te beskerm.

Die DA het verlede week ʼn veldtog van stapel gestuur deur dié petisie op te stel in reaksie op die vlaag aanvalle op plase en kleinhoewes landswyd. Ina Cilliers, woordvoerder vir die DA, sê altesaam 184 plaasaanvalle en 20 plaasmoorde het reeds vanjaar plaasgevind.

Volgens Cilliers was die meeste van hierdie aanvalle in Gauteng met 51 voorvalle. Sy voeg by teen die einde van 2018 was 29 000 veediefstalsake in Suid-Afrika aangemeld. Veediefstal kos die land miljarde rande en eis sy tol op die landbou‑ekonomie. ʼn Studie deur Unisa oor landelike veiligheid het bevind R1,3 miljard word jaarliks aan veediefstal verloor.

“Die toenemende aanvalle op ons plattelandse gemeenskappe is die gevolg van ʼn gebrek aan politieke leierskap. Die regering se landelike veiligheidstrategie is ʼn klaaglike mislukking, want die polisiestasies in die landelike gemeenskappe wat die ergste deurloop, het te min personeel en hulpbronne. Die SAPD is toenemend minder in staat om landelike gemeenskappe te beskerm,” het Cilliers gesê.

Sy het daarop gewys dat boere nie net voedselsekerheid bied nie, maar ook werksgeleenthede skep en tot die land se BBP bydra.

Cilliers sê om die plaasaanvalprobleem op te los, moet verskeie dringende ingrypings gedoen word, insluitend:

– Landelike veiligheidseenhede moet weer op die been gebring word en behoorlik toegerus word;
– Innovasie in nuwe tegnologie soos hommeltuie, ShotSpotter en geo-omheining moet dringend ingestel word;
– Die SAPD moet landelike misdaad as prioriteitsmisdaad verklaar en aparte en akkurate statistiek hiervan byhou;
– Die polisiereservisteprogram in plattelandse gebiede moet behoorlik geïmplementeer word met ʼn toegewyde poging om boere, plaaswerkers en plaasbewoners te werf en op te lei.

Cilliers het ʼn beroep op Suid-Afrikaners gedoen om hul stem te laat hoor deur die petisie te onderteken wat binnekort aan die president oorhandig sal word. “Voedselprodusente is ʼn nasionale bate en hulle kan nie werk as hulle nie veilig is nie. Ons landelike gemeenskap is onder beleg. Ons moet nóú optree.”

Die DA hoop om 20 000 handtekeninge op die petisie te kry.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

111 Kommentare

jongste oudste gewildste
PJ

Snaaks die DA skrik nou wakker taamlik stil gewees in die verlede of dink hulle hulle gaan stemme terug kry ek glo nie so hulle mos reeds hulle ware kleure gewys onthou Shweizer Reineke ?

Pop

Hoe sien ek nou geen kommentaar hieroor nie. ? Dalkies oor dit nou die DA is wat plan maak en nie die FV nie?? Ek wonder net. Dankie DA, ek sal daai petisie teken, en as die klakouse oor julle nou net dit bietjie eenkant toe skuif en ook maar teken sal ons ver oor die 20,000 kry.

JP

Die DA beweeg nou in die regte rigting, alhoewel biedjie laat, maar ons sien darem nou beweging

Andreas

Wonderlik! Dankie Solidariteit, Afriforum en die VF Plus, dat julle die skroewe so aangedraai het dat die DA ook nou die lig begin sien, wel éintlik om te keer dat hulle nie meer ondersteuners verloor nie. Nou moet Cyril en die ANC ook nou nog net volg.

smurfie

waar kry n mens die lys om ook te kan teken?