Duisende ‘Nee-stemme’ aan Discovery-bank oorhandig

adrian gore discovery

Adrian Gore die uitvoerende hoof van Discovery. (Argieffoto)

Solidariteit gaan vandag ʼn memorandum en stemme van sowat 200 000 mense wat gekant is teen die instelling van Discovery Bank se beoogde aandeleskema wat wit mense uitsluit, aan Discovery se hoof- uitvoerende beampte, Adrian Gore, by die groep se hoofkantoor in Sandton oorhandig.

Dit volg nadat Solidariteit ʼn reuseveldtog van stapel gestuur het om “Nee”-stemme teen die inwerkingstelling van Discovery Bank, waar 10% van die aandele in die bank aan swart kliënte voorsien gaan word, in te samel.

Gore, wat bevestig het dat hy self die memorandum gaan ontvang, het hierdie aandeleskema verlede jaar met die bekendstelling van Discovery se bank bekendgemaak.

Volgens dr. Dirk Hermann, bestuurshoof van Solidariteit, het duisende mense, wat onder andere ondersteuners, lede en aanlyn petisies insluit, die petisie teen die inwerkingstelling van die bank in sy huidige formaat onderteken.

“Die ontsteltenis wat rakende hierdie bank heers, handel daaroor dat getroue Discovery-kliënte uitgesluit word uit ʼn aandeleskema bloot oor die kleur van hulle vel.

“Discovery moet weet dat indien hy voortgaan om die staat se absolute rasse-ideologie toe te pas wat mense op grond van velkleur uitsluit, daar noodwendig gevolge sal wees.

“Ons boodskap aan Discovery is bloot indien hy voortgaan om die bank in sy huidige formaat in werking te stel, is daar duisende mense wat dit nie gaan ondersteun nie,” het Hermann gesê.

Die vakbond en AfriForum het verlede jaar met Gore vergader om hulle kommer oor die bank se rasgedrewe voordele vir kliënte te bespreek.

“Gore en sy span se verskoning was dat die Reserwebank druk op die groep plaas om die soort benadering te volg. Ons verwagting was dat hulle ten minste sal terugdruk om hulle kliënte te beskerm, maar hulle probeer nie eens om dit te doen nie, Discovery gee eenvoudig net toe,” het Hermann gesê.

Connie Mulder, hoof van Solidariteit se Navorsingsinstituut, sê Discovery Bank maak daarop staat dat hulle die meeste van hulle mediese en versekeringsdienste in kliënte vir die nuwe bank sal kan omskep.

“Hulle mik ook nie noodwendig vir ʼn laer inkomstegroep nie, al sê Discovery die bankkoste sal goedkoper wees. Ons bereken sowat 600 000 van Discovery se kliënte is wit en hulle moet na die helfte van hulle kliënte luister as hulle nee sê. Ons glo Discovery weet dit.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

50 Kommentare

jongste oudste gewildste
Erwee

Nee en weer Nee..tien duisend maal nee…

Deneller

Ons was vir baie jare geforseer om aan die Discovery mediese fonds te behoort. Dit het laasjaar verval en baie van ons is onmiddellik weg na meer bekostigbare fondse toe. Die debakel oor die gratis aandele vir soustrein passasiers het die besluit om te skuif baie makliker gemaak.

stephan

Self my stem gelewer, maar dis ‘n mors van tyd, regtig. Gaan in elk geval maak nes hulle wil. Enigste manier om hulle te laat voel, is om te boikot, maar hoeveel mense gaan dit waarlik doen?

Tersia

Solidariteit Kan met 600000 lede hulle eie mediese fonds begin. Daar sal nog baie meer mense aansluit. Ons betaal deur ons nekke op die oomblik en kry bitter min voordele van Discovery. Dink daaraan asb.

John

Die bank is suiwer ‘n kluis om al die lekker bydraes in te bère en die aandele bloot omkoopgeld vir die behoud van daai kluis, want die ANC beoog die gryp van fondse… alle fondse in die land… a la Venezuela. Hierdie was ‘n poging om te ontkom aan die planne wat in elke geval nie sou werk nie, want lenings… sonder rente is die volgende stap wat gedoen sal word om die Afro-lekkerlewe-ideaal te verwesenlik. Dieselfde storie het by Sasol afgespeel.