Twee polisiebeamptes verbonde aan die Durbanse honde-eenheid en ʼn derde beampte, verbonde aan die Pinetown-misdaadintelligensie-eenheid, verskyn Maandag in die landdroshof in die stad nadat hulle vir beweerde diefstal van R2,2 miljoen in hegtenis geneem is.
Die geld is glo tydens kamma soek-en-beslagsleggingsoptredes gesteel.
Kol. Katlego Mogale, polisiewoordvoerder, het gesê die polisebeamptes het in April verlede jaar by die slagoffer se huis opgedaag onder die voorwendsel dat hulle na ʼn onwettige vuurwapen op soek was.
Terwyl hulle die perseel deursoek het, het die beamptes glo op twee kartonbokse en ʼn kluis met altesaam R2,2 miljoen afgekom. Hulle het op die geld beslag gelê, maar glo geen dokumentasie verskaf oor waarheen die geld geneem gaan word nie, het sy gesê.
Die polisielede het die slagoffer ook glo verhoed om hulle te volg na waarheen hulle ook al met die geld op pad was.
Die slagoffer het ʼn klag by die Hillcrest-polisie aanhangig gemaak, wat dit na die Valke se eenheid vir ernstige korrupsie-ondersoeke verwys het.
“Nadat ʼn lang en deeglike ondersoek gedoen is, is vyf mense met die misdaad verbind,” het Mogale gesê.
Benewens die drie sersante wat reeds in hegtenis geneem is, is die polisie steeds op soek na nog ʼn polisielid, ʼn adjudant-offisier, asook ʼn burgerlike wat glo by die misdaad betrokke was.
Die polisielede sal verskyn op aanklag van diefstal of alternatiewelik gewapende roof.
Lekker ek hoop julle korrupte klomp gaan sit!
Een van die dae gaan daar net polisiebeamptes in die tronke wees. ‘n See van blou in die selle.
Dit gaan snaaks wees! Ek hou nogals van daai idee dan hoef my kind niks so bang te wees vir hulle nie dit kan werk
So by my kool.Is dit nie die manne en vroue in blou wat ons moet beskerm nie.Daar gaps hulle sommer gou-gou R 2.2 miljoen rand.Is dit wat dit kos om ‘n soek-en beslagleggingsoperasie uit te voer.Maar hoekom was daar so ‘n helse klomp geld op die perseel?Nee Lizelle hulle dra oranje pakkie om die eerlikes in blou van die baddies te onderskei. Omie met die hoed,wat sê jy daarvan he.
Dis net verstommend hoe kriminaliteit onder die ANC hooggety vier. Dis amper of dit deel van hulle beleid is.