Dutton wil boere steeds help ondanks kritiek

Peter Dutton. Foto: Facebook

Peter Dutton, Australië se minister van binnelandse sake, het gesê hy gaan voort met sy planne om die moontlikheid te ondersoek om humanitêre visas aan wit Suid-Afrikaanse boere beskikbaar te stel ondanks kritiek dat dié pogings van hom rassisties is.

ABC News berig Dutton het in ‘n onderhoud met die radiostasie, 2GB, gesê die vlaag kritiek wat hy ontvang het ná sy uitsprake oor die “gruwelike omstandighede” wat Suid-Afrikaanse boere in die gesig staar, “beteken niks vir hom nie”.

“Ons kyk na maniere waarop ons mense kan help om na Australië te emigreer as hulle hulself in daardie situasie bevind. Ons is oorval met boodskappe van ondersteuning en verwysings vir spesifieke gevalle. Ek is heeltemal blind vir iemand se velkleur, dit maak geen verskil aan my nie,” het Dutton gesê.

“Dit is vir my kommerwekkend dat mense op die oomblik vervolg word – die getal mense in Suid-Afrika wat doodgaan of wreedaardig aangeval word, is ʼn realiteit.”

Maroela Media het vroeër berig Lindiwe Sisulu, die Suid-Afrikaanse minister van internasionale betrekkinge en samewerking, het verlede week ʼn diplomatieke démarche aan Adam McCarthy, die Australiese hoë kommissaris in Suid-Afrika, gerig om aan te dring dat Dutton se uitsprake oor grondonteiening teruggetrek word.

Die departement het gesê die Suid-Afrikaanse regering neem aanstoot deur Dutton se uitlatings. “Daar is geen rede vir enige regering, enige plek ter wêreld om te vermoed dat enige Suid-Afrikaner in gevaar is van hul eie demokraties-verkose regering nie. Daardie bedreiging bestaan doodgewoon nie,” het Sisulu gesê.

Intussen het Richard Di Natale, die leier van die Australiese Greens-party, Dutton as ʼn rassis bestempel. SBS News berig Di Natale het aan verslaggewers in Australië gesê Dutton is “uit en uit ʼn rassis” wat blykbaar “die wit Australië-beleid wil terugbring”.

Volgens SBS News het Michael Sukkar, Australië se assistent-tesourier, gesê beskuldigings dat Dutton ʼn rassis is, is “lagwekkend”. Sukkar het daarop gewys dat die Australiese regering reeds mense van Sirië en Irak deur hul humanitêre program gehelp het en dat dit net reg is dat die “vervolgde wit boere” se saak ook oorweeg word.

Julie Bishop, Australië se minister van buitelandse sake (Foto: Manuel Elias/United Nations via AP)

Julie Bishop, Australië se minister van buitelandse sake, het in reaksie op Dutton se uitsprake gesê daar is geen planne om wit boere prioriteit te gee bo ander humanitêre visum-aansoeke nie.

News24 berig intussen dat Julius Malema, leier van die EFF, Woensdag tydens ʼn Menseregtedag-viering in Mpumalanga gesê het “rassiste moet Australië toe gaan as hulle wil”.

“Hulle moet net die sleutels van die trekkers los, want ons wil die grond bewerk. Hulle moet die sleutels van die huise los, want ons wil in daardie huise bly. Hulle moet alles los waarmee hulle nie Suid-Afrika toe gekom het nie,” het Malema gesê.

Volgens News24 het Malema bygevoeg mense wat na Australië emigreer sal arm wees daar. “Hulle is ryk hier, want hulle buit swart mense uit.” Hy het gesê dié wat na Australië toe emigreer, sal uiteindelik weer “stert tussen die bene” terugkeer Suid-Afrika toe. “Dan sal ons hulle in diens neem, want ons sal die eienaars van hul plase wees.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

32 Kommentare

jongste oudste gewildste
Eish

Dit is verblydend dat mnr. Dutton sy standpunt handhaaf. Die moddergooiery rondom die aangeleentheid verskaf goeie publisiteit met dank aan die Greens party.
Die bal is aan die rol en ek vertrou almal betrokke sal voortbou op die momentum.

Heleen

Dankie Dutton ..hierdie natale en julie het duidelik geen benul oor wat hier aangaan nie…of hulle gee net nie om nie…en julius…ek dink die boere.. en ek ook…sal eerder arm en veilig wees as om gedurig bevrees te wees….in elke geval..ons is baie hardwerkende mense..gladnie lui nie en sal dus suksesvol wees…….en ‘n aanwins vir enige land….

Heleen

So waarom word my kommentaar nie gepubliseer nie??? Maroela???

Callie

Hemel SA se blankes, staan op en klap hande vir n man wat die waarheid raaksien. Een wat beginsels het. Dankie mnr Dutton. Ons het dit nodig.

Callie

Nog iets Malema. Die plaas onder julle sal bankrot en gestroop wees. Niemand sal daar kan werk nie