Duur projek om boere te help flop

Die regering het glo reeds meer as R1 miljard aan dié parke bestee.(Argieffoto)

Dit blyk dat die regering se agriparke-inisiatief wat begin is om opkomende boere te help om tot die landbousektor in Suid-Afrika toe te tree, steeds nie enige vrugte afwerp nie.

Die inisiatief is in 2015 deur die regering van stapel gestuur en sou teen die einde van 2020 afgehandel gewees het. R2 miljard is vir die projek opsygesit. Oudpres. Jacob Zuma het destyds gesê dat agriparke in 27 van die land se armste distriksmunisipaliteite opgerig sou word om die landelike ekonomie te bevorder.

’n Agripark bestaan onder meer uit ’n produksie-, verwerkings-, verpakkings-, opleidings- en logistieke eenheid. Daar is ook ’n eenheid wat die verhuring van toerusting hanteer. Die parke moes boere onder meer help om hul produkte te verpak en te versprei.

Volgens Annette Steyn, DA-parlementslid, is daar min vordering of sukses met dié projek.

Teen 2018 was daar glo nog net vier agriparke wat gedeeltelik operasioneel was – in Gauteng, Noordwes, die Oos-Kaap en die Wes-Kaap.

Luidens ʼn dokument wat Steyn in haar besit het en op Twitter gedeel het, het die regering reeds meer as R1 miljard aan dié parke bestee. Die meeste hiervan is in die Oos-Kaap (R166 miljoen), KwaZulu-Natal (R160 miljoen) en Noordwes (R157 miljoen) bestee.

Van dié uitgawes het skynbaar dadels gekom.

“Dit was uit die staanspoor die verkeerde besluit. Ons kry ook geen antwoorde van die regering oor die vordering en funksionering van die agriparke nie,” het Steyn gesê.

“Die regering wou met agriparke ’n tweede ekonomie skep en dit werk nie so nie.”

Volgens haar moet daar éérs na die produksie op plase self gekyk word om seker te maak dat dié plase operasioneel is en funksioneer.

“Die primêre produk moet op grondvlak reg wees sodat nuwelinge in die landbousektor op ’n normale wyse tot die mark kan toetree.”

Volgens Bennie van Zyl, hoofbestuurder van TLU SA, het die regering met dié inisiatief onrealistiese verwagtinge geskep dat daar onder meer aan nuwe boere ’n mark gegee sou word.

“Dit is ’n ontwikkelende proses. Daar is eerstens opleiding vir dié mense nodig. Hulle vermoë om te boer moet ontgin word.”

Van Zyl het gesê dat TLU SA die regering verskeie kere genader het om idees uit te ruil oor wat gedoen kan word om aan nuwe toetreders ’n billike kans te gee.

“Ons wou saam met hulle om ’n tafel sit en hulle help om planne te beraam, maar hulle het ons voordurend eenkant toe gevee.”

Volgens Van Zyl het die regering met dié projek weggeval sonder om voldoende marknavorsing en behoeftebepalings te doen.

“Daar is nie genoeg produsente om die projek volhoubaar te maak nie. Nuwe boere moet stelselmatig opgelei word.”

Van Zyl het gesê dat die regering met dié projek baie geld in die water gegooi het.

Die departement van landelike ontwikkeling en grondhervorming het nie op Maroela Media se navrae reageer nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

28 Kommentare

jongste oudste gewildste
Piet

Boere gaanie ñ sent daarvan sien nie,, Nie wit boere nie,,

David

Mens hoef seker nie te wonder in wie se sakke die “besteding” opgeëindig het nie..

Kanjynoumeer

SOS – same old story.
Jy kan of net lag en jou kop skud of naar raak!!

Anel

Ek begin al meer glo dat ons belasting moet begin weerhou. Hoe kan mens net aanhou en aanhou en aanhou om geld, wasrvoor jy hard gewerk het, weg te gee. En dit aan ‘n spul onbevoegde, onopgeleide kaders!!!

Joe Olivier

Alles wat hulle aan raak verander in bollie.