E-tol ‘nie deel van Gauteng se toekoms’

Argieffoto van ‘n betoging teen die e-tolstelsel. (Foto: Maroela Media)

Die Gautengse premier sê die provinsie se standpunt oor die omstrede e-tol‑stelsel in die provinsie bly “onveranderd”.

“Ons is vasbeslote dat e-tol nie deel van die provinsie se toekoms is nie,” het David Makhura Maandag tydens sy provinsiale rede in Soweto gesê.

“Ons wag angstig op die nasionale regering se finalisering van maniere om die [e-tol-] skuld te delg. Ons is selfs bereid om as provinsiale regering by te dra om te verseker dat e-tol geskrap word. Daar is nou geen omdraaikans nie,” het Makhura gesê.

Wayne Duvenage, uitvoerende hoof van die Organisasie teen Belastingmisbruik (Outa), sê die stelsel stort daagliks verder inmekaar en hoewel die premier al by verskeie geleenthede gesê het die stelsel moet geskrap word, is daar nog nie veel gedóén om dit te laat gebeur nie.

Die Gautengse premier, David Makhura. (Foto: Gertrude Makhafola/ANA)

“Die mag lê uiteindelik by die minister van vervoer (Fikile Mbalula) en die president (Cyril Ramaphosa). Húlle moet die finale besluit neem, hoewel die premier steeds baie druk op hulle kan plaas,” het Duvenage gesê.

Mbalula is Suid-Afrika se sewende vervoerminister die afgelope tien jaar, wat beteken daar is weinig bestendigheid in die departement, sê Duvenage.

Hy sê een manier is vir die Gautengse provinsiale regering om sélf op te hou om sy e-tol‑rekening te betaal. Die provinsie kan ook ʼn dispuut met die nasionale regering oor die stelsel verklaar.

Anders as in die Wes-Kaap, het die Gautengse provinsiale regering hom nie destyds, toe die stelsel geïmplementeer is, daarteen verset nie. Die Stad Kaapstad het in 2017 die Suid-Afrikaanse Nasionale Padagentskap (Sanral) konstitusionele hof toe gesleep om hom te keer om sekere hoofweë in die provinsie te tol. Sy aansoek is toegestaan.

In Maart vanjaar, kort voor die nasionale verkiesing, het Sanral boonop die proses om e-tol‑skuld in te vorder, vir eers opgeskort. Tóé het motoriste se skuld aan Sanral op nagenoeg R11 miljard gestaan.

Duvenage sê na raming betaal net sowat 20% van motoriste in dié stadium hulle e-tol‑rekeninge.

Hy sê daar is ander maniere, onder meer die brandstofheffing en belasting, om paaie te finansier.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

19 Kommentare

jongste oudste gewildste
Adriaan Theron

Ek het ‘n plan om die bestaande strukture te benut vir ‘n heel ander rol wat vir Gauteng Miljoene Rande kan genereer. Dit is glad nie tol verwant nie.

Wielspore

Na my mening is tolgeld in SA buitensporig hoog en word die geld wat ingevorder word nie vir die instandhouding van paaie gebruik. Wie het al ooit enige verslag gesien van hoeveel tolgeld byvoorbeeld by Middelburg MPA tolhek ingevorder is en hoeveel van die geld is vir pad instandhouding gebruik.
Weg met e-Tol en enige nader vorm van tolgeld, die verbruiker betaal alreeds te veel belasting.

sweis

Great,nou nog net betoog teen diskriminerende wette teen witmense en as dit geskrap word kan ons vorentoe.

Anoniem

Hopelik verdwyn die tolhekke by die Stormvoe”l en Zambesi afritte ook soos mis voor die son…

SjN

Volgens sy kleredrag het Makhuru verseker n side line job, hoop hy het dit verklaar.