Een mens is beseer toe ʼn brand Sondag by ʼn gewilde hotel op Durban se strandfront uitgebreek het.
Garrith Jamieson, woordvoerder van Rescue Care Paramedics, het gesê die brand het omstreeks 18:00 by die Blue Waters-hotel uitgebreek.
“Toe paramedici by die toneel opdaag, was die Durban-brandweer en metropolisie reeds op die toneel. Die hotel is ontruim en mense na veiligheid gebring,” het Jamieson gesê.
Volgens Jamieson is die brand vinnig in bedwang gebring.
“Een vrou wat op die vyfde verdieping was, het geringe beserings opgedoen. Sy is op die toneel gestabiliseer en na ʼn nabygeleë hospitaal geneem vir verdere mediese behandeling.”
Die oorsaak van die brand is nog nie bekend nie, maar die polisie, metropolisie en brandweer het ʼn ondersoek na die oorsaak van stapel gestuur om dit te bepaal.
Daai selfde gebou het ‘n paar jaar terug ook gebrand!
Ek het al baie daar gebly, maar is nou oortuig dat dit nie meer veilig is nie.
Foutiewe elek bedrading , goedkoop/swak onderhoud = kortsluiting = brand
Dit laat mens wonder. Koos jy is reg, daar was jare terug ook ‘n brand. Die Blue Waters Hotel was in die jare 70’s ‘n baie spoggerige 5 ster hotel.