Een dood toe gevangenes korrektiewe beamptes pak

Argieffoto

’n Gevangene is dood ná ’n skermutseling tussen gevangenes en beamptes by ’n korrektiewe sentrum in KwaZulu-Natal.

Een korrektiewe beampte is weens die voorval by die Pietermaritzburg Medium A-sentrum in ’n kritieke toestand gelaat.

Sechaba Mphahlele, woordvoerder van die provinsiale departement van korrektiewe dienste, sê gevangenes, wat as maksimum risiko geklassifiseer is, het Vrydagmiddag die korrektiewe beamptes by die sentrum aangeval.

Een van die beamptes het tydens die aanval agt steekwonde aan sy kop en twee aan sy arm opgedoen. Die beampte is ná die voorval in ’n kritieke toestand na ’n hospitaal geneem waar hy tans behandeling ontvang.

Nog ’n korrektiewe beampte is met ’n geswelde oog gelaat nadat hy herhaaldelik met die vuis geslaan is.

“Een gevangene is tydens die harwar om die aanval stop te sit, dood en die omstandighede wat tot sy dood gelei het, word tans ondersoek,” sê Mphahlele.

’n Saak is by die polisie aanhangig gemaak en die voorval is ook by die regterlike inspektoraat vir korrektiewe dienste aangemeld.