Een hospitaal na die ander weier om man te behandel

“Ons sien hoe ons pa daagliks wegkwyn, en daar is niks wat ons daaraan kan doen nie.”

Die familie van André Bezuidenhout (62) is al raadop omdat verskeie Gautengse hospitale glo volstrek weier om hom te behandel vir ʼn infeksie wat hy weens ʼn ánder dokter se beweerde nalatigheid opgedoen het.

’n Bakteriële infeksie het drie jaar gelede in Bezuidenhout se rug ontstaan ná ʼn operasie waartydens skroewe in sy rug aangebring is as behandeling vir ʼn besering. Volgens sy familie verswak sy toestand daagliks. Nietemin het verskeie hospitale reeds geweier om hom weer te behandel. “Hulle prop hom net elke keer ʼn pakkie pille in sy hand en stuur hom dan huis toe,” het Zania Prinsloo, Bezuidenhout se dogter, aan Maroela Media gesê.

’n Geldinsamelingspoging is intussen begin om Bezuidenhout in ’n private hospitaal te laat opneem.

Bezuidenhout se gesondheidstryd het in 2012 begin toe hy ’n operasie moes ondergaan nadat hy sy rug by die werk seergemaak het. Hy is daarna ongeskik verklaar om verder te werk.

Volgens Prinsloo het haar pa altesaam vyf operasies aan sy rug ondergaan. Die dokters het aanvanklik skroewe in sy rug aangebring, maar dié het sowat vyf jaar later sepsis veroorsaak.

Bezuidenhout is in 2017 na die Edenvale-staatshospitaal in Johannesburg, nadat ’n groot knop op sy lae rug gevorm het. Volgens Prinsloo het die dokters aanvanklik gedink dit is ’n abses en het die knop oopgesny om die vog te dreineer.

“Dokters kon later vasstel dit is die skroewe wat nie met sy liggaam akkordeer nie. Die skroewe is glo nie korrek ingesit nie en het sepsis veroorsaak,” vertel Prinsloo. “Die skroewe moet uitgehaal word, want dit vergiftig my pa se liggaam, maar niemand wil dit verwyder nie.”

Prinsloo sê haar pa se gesondheid het in 2018 begin verswak. Hy bly sedertdien in die Allen Park-ouetehuis in Kempton Park.

Volgens Prinsloo het haar pa chronies pyn en kan hy nie meer self loop nie. Hy is ook byna permanent bedlêend.

“My pa het my verlede week gebel en gesê: ‘Sussie, ek is besig om dood te gaan’. Hy lyk soos ’n geraamte. Hy kan nie eet nie omdat hy sere in sy mond het. Hy sukkel met koors, hy begin ontwater en braak aanhoudend. Hy kan nie eens ’n koppie koffie vashou nie, want hy bewe te veel.”

Bezuidenhout het sedert 2018 by talle staatshospitale om hulp aangeklop, maar volgens Prinsloo het die dokters keer op keer ’n verskoning gehad waarom hulle hom nie ʼn operasie kan doen nie.

“In 2018 het ons my pa na Thembisa-hospitaal geneem. Dié het ons na die Steve Biko-hospitaal in Pretoria verwys. In Steve Biko het dokters X-strale van my pa se rug geneem, bloedtoetse gedoen, hom op ’n drip gesit en daarna huis toe gestuur. Ons het hom een keer elke drie maande vir ’n jaar en ʼn half lank soontoe gevat, waar hy net ’n drip gekry het en dan weer huis toe gestuur is. Dieselfde het herhaaldelik by die Thembisa-hospitaal en die Johannesburg Algemene Hospitaal gebeur.

“Die dokters kon duidelik sien my pa is baie siek en kort mediese hulp, maar hulle wou hom nie eens in die hospitaal opneem nie.”

Prinsloo het Bezuidenhout verlede Donderdagaand weer na die Edenvale-hospitaal geneem, waar dokters hom ondersoek en bevestig het dat die skroewe uitgehaal moet word. Bezuidenhout is egter ’n paar uur later, sonder ʼn behoorlike rede, huis toe gestuur.

Prinsloo het Bezuidenhout toe Vrydag na die Tambo Memorial-hospitaal in Boksburg geneem, sodat hy dáár opgeneem kan word. “Hy het weer eens net ’n drip in ongevalle gekry en is daarna met pynpille huis toe gestuur.”

Prinsloo sê met die stygende Covid-19-gevalle is dit boonop ’n risiko om haar pa na ʼn hospitaal te neem waar hy aan die virus blootgestel kan word.

Bezuidenhout beskik nie oor ’n mediese fonds of salaris om ’n private hospitaal te kan bekostig. Hy moet met slegs ’n klein staatspensioen aan die lewe bly. Prinsloo sê sy kan ook nie sy hospitaaluitgawes bekostig nie.

’n Nie-winsgewende maatskappy van Nelspruit, Warriors and Angels, het intussen ’n geldinsameling van stapel gestuur om Bezuidenhout in ’n private hospitaal in dié stad te laat opneem.

Marcélle Metz het dié maatskappy gestig met die doel om siek mense, wat nie die nodige mediese hulp kry nie, te help.

Sy vertel die maatskappy het ’n buskaartjie vir Bezuidenhout gekoop om Vrydag na Nelspruit te reis, sodat hy Maandag in die Mediclinic- private hospitaal in Nelspruit opgeneem kan word. Dit sal egter net moontlik wees indien hulle voldoende geld hiervoor ingesamel het.

Die maatskappy wil ook geld insamel om ’n rolstoel vir Bezuidenhout te koop omdat hy nie meer kan loop nie. “Enigiemand wat ’n ou rolstoel wil skenk, is ook meer as welkom,” sê Metz.

Enigiemand wat graag ’n bydrae wil maak, kan Metz by 071 392 1037 skakel.

Maroela Media het Donderdag reeds ’n navraag aan die Gautengse departement van gesondheid oor die aangeleentheid gerig, maar nog geen terugvoer ontvang nie.