Een klag teen Duduzane teruggetrek

Duduzane Zuma daag Dinsdag by die Randburg-landdroshof op. (Foto: Mia Spies/Twitter)

Een van die aanklagte van strafbare manslag teen Duduzane Zuma, seun van oudpres. Jacob Zuma, wat ná ʼn noodlottige motorongeluk aangekla is, is Dinsdagoggend in die Randburg-landdroshof teruggetrek.

Duduzane het weer vanoggend in dié hof verskyn in verband met die dood van twee passasiers van ʼn minibustaxi in Februarie 2014. Hy het met sy Porsche teen die minibustaxi gebots.

eNuus berig dat die hof vandag een aanklag van strafbare manslag laat vaar het omdat een van die oorledenes ʼn bestaande mediese toestand gehad het.

Duduzane staan dus nou tereg op een aanklag van strafbare manslag asook ’n aanklag van roekelose en nalatige bestuur nadat daar aanvanklik twee aanklagte van strafbare manslag teen hom aanhangig gemaak is.

Duduzane het onskuldig gepleit op alle aanklagte teen hom, het eNuus berig.

Phumzile Dube is destyds in die botsing dood. Nog ʼn passasier, Nanki Jeanette Mashaba‚ wat in die ongeluk beseer is, is ʼn paar weke later oorlede.

Die Nasionale Vervolgingsgesag (NVG) het aanvanklik besluit om Duduzane nie in verband met die noodlottige botsing te vervolg nie.

In die geregtelike ondersoek wat daarna plaasgevind het, is daar later wel bevind dat Duduzane nalatig was en vir strafbare manslag vervolg kan word.

In ʼn verklaring wat vanoggend deur sy regsverteenwoordiger in die hof voorgelees is, erken hy wel dat hy destyds beheer oor sy voertuig verloor het nadat hy ʼn waterpoel getref het.

eNuus berig die hof het gedurende vandag se verrigtinge aan Duduzane gevra waar sy pa is, aangesien Zuma by die meeste van sy seun se hofverskynings teenwoordig was. Hy het geantwoord dat sy pa onderweg is.

Duduzane is een van die oudpresident se 22 kinders.

Die verhoor duur voort.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

28 Kommentare

jongste oudste gewildste
alida

Dit is tog algemene kennis dat hy skotvry hiervan sal afkom. Hoekom mens flous met hofverskynings. Maak mens siek.

Jem

Ek stem saam jou Alida. Op die einde van die dag is dit net die arme belastingbetalers wat moet opdok.

? leser

nou hoe weet die hof dat die een oorledene ‘n mediese toestand gehad het, hy/sy is dan dood

Genieve

Laaste paragraaf…die hof het vir hom gevra waar sy Pa is kan jy glo wat het sy verskyning met sy pa te doen????..die regstelsel faal ons elkedag

Piet

So die man sou in elk gevsl dood gegaan het op daai elfde oomblik al was hy nie in die ongeluk nie ????????????