Een sterf, talle beseer in Centurion-botsing

Een persoon het gesterf en talle ander is beseer. (Foto: Emer-G-Med)

Een mens is dood en verskeie ander is in ʼn bedenklike toestand ná ʼn botsing op die R55, in die omgewing van Centurion in Gauteng, vroeg Saterdagoggend.

Kyle van Reenen, woordvoerder van Emer-G-Med, sê verskeie nooddienste het hulle na die toneel gehaas waar talle van die beseerdes steeds in die pad gelê het.

“Die verwronge wrak van ʼn ligte afleweringsvoertuig is op sy dak aangetref, terwyl ʼn ligte motor teen ʼn muur tot stilstand gekom het,” sê Van Reenen.

Die motor het teen ‘n muur tot stilstand gekom. (Foto: Emer-G-Med)

Een van die beseerdes is na ‘n hospitaal gevlieg. (Foto: Emer-G-Med)

Volgens ooggetuies het een van die voertuie die ander glo teen die kant getref. Die bakkie, wat vol passasiers was, het omgeslaan en die mense is van die voertuig geslinger.

ʼn Vrou van naastenby 40 jaar oud is op die toneel dood verklaar.

“Sestien ander mense het beserings opgedoen wat wissel van ernstig tot kritiek en die hulp van die Halo-lugambulans is ingeroep,” sê Van Reenen.

Ander pasiënte is met ambulanse na verskillende hospitale geneem.

Die polisie ondersoek die voorval.

In ʼn afsonderlike voorval is drie mense in Bloemfontein dood nadat ʼn motorbestuurder oënskynlik kort voor middernag op ʼn nat pad in Scholtzstraat, Universitas, beheer oor die voertuig verloor en dit ʼn boom getref het.

Drie mense het in die ongeluk in Bloemfontein omgekom. (Foto: Med24/7)

Jaco Kaalsen, ʼn paramedikus by Med24/7 in die stad, sê die drie insittendes – twee mans en ʼn vrou – het met paramedici se aankoms op die toneel reeds gesterf.

Die drie is in die wrak vasgekeer en die liggame moes met behulp van die brandweer bevry word.

Die polisie ondersoek ook dié voorval.