Die Bram Fischer-lughawe. (Foto: Google)
Een persoon is dood en nog een ernstig beseer toe ʼn ligte vliegtuig Saterdagoggend by die Bram Fischer Internasionale Lughawe in Bloemfontein neergestort het.
Die vliegtuig, vermoedelik ʼn Piper met net die twee insittendes aan boord, het op ʼn grasveld naby die lughawe neergestort en aan die brand geslaan, aldus die Lughawemaatskappy van Suid-Afrika (Acsa).
Volgens Sipho Towa, woordvoerder van die Vrystaatse nooddienste, het die vliegtuig, wat glo vir opleiding gebruik word, tydens die landing neergestort.
Kapt. Loraine Earle, polisiewoordvoerder, sê die oorlewende insittende is vanoggend met ernstige beserings na ʼn nabygeleë hospitaal gehaas.
Soos Maroela Media verstaan is die persoon na die Busamed-hospitaal in die stad geneem vir mediese behandeling.
ʼn Geregtelike doodsondersoek sal gedoen word.
