Een van drie vermiste kleuters opgespoor

[OPVOLG] Die polisie het intussen bevestig dat al drie kleuters opgespoor is. Lees die opvolgberig hier.

Linandle Zenzile is gevind. Foto: SAPD

Een van die driejarige kleuters wat Dinsdagaand spoorloos in Motherwell in die Oos-Kaap verdwyn het, is gevind.

Kol. Priscilla Naidu, woordvoerder van die polisie, sê Linandle Zenzile (3) is Woensdagmiddag deur werkers gevind waar hy op ʼn weegbrug by ʼn steengroef tussen Uitenhage en Motherwell gesit het. Die werkers het die polisie in kennis gestel en beamptes het die kind daar gaan haal.

“Behalwe dat hy honger en uitgeput was, lyk hy fisies ongedeerd. Hy is wel na ʼn hospitaal geneem om ondersoek te word,” sê Naidu. Die kleinding het aan die polisie gesê hy en die ander twee kleuters het verlore geraak en in die bos geslaap.

Maroela Media het vroeër berig Linandle het Dinsdagmiddag saam met Othandwayo Zenzile (3) en Nande Nombewu (3) in ʼn oop stuk veld naby hul huis gespeel. Nadat die kleuters omstreeks 15:00 nie meer gewaar is nie, het hulle ouers in die omgewing na hulle begin soek.

Die polisie is omstreeks 22:00 ontbied toe die kleuters teen daardie tyd steeds nie gevind was nie en ʼn volskaalse soektog is van stapel gestuur.

Naidu sê die soektog na die ander twee kleuters duur steeds voort. Die gemeenskap het in groot getalle by die soektog aangesluit en die polisie se soek-en-reddingseenheid met snuffelhonde, asook die lugvleuel, help om in die digte bosse te soek waar die kinders vermoedelik kan wees.

Othandwayo het ten tyde van sy verdwyning ʼn grys kortbroek en ’n swart gestreepte T-hemp aangehad en Nande ’n rooi sweetpak en ’n blou T-hemp. Enige inligting wat die polisie in hul soektog kan help, kan by kapt. Shaun Harmse by 082 442 1232 of die naaste polisiestasie aangemeld word.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

6 Kommentare

Landi ·

Christa, dis seker moviese lekker om so judgemental te wees, ne…

My mening ·

Christa is ongelukkig reg. Kinders van 3 jaar kan nie alleen gelos word nie.

Maritza ·

Jy kan maar gaan kyk in nedersettings van armes is die kinders altyd op eie genade, speel aleen in die veld ens. Hoe kan jy ‘n 3jarige onder jou toesig laat gaan, hoekom het hulle nie by die huis gaan sit en speel nie,waar daar toesig veronderstel is om te wees. Ek as ‘n mamma is baie dankbaar dat die kinders gevind is, dis tog jou werk as ouer om jou kind op te pas en te beskerm vir al nou waar dinge in ons land vol lelik en harseer is.

OK MAAR NET KINDERS ·

My hart breek as ek net dink hoe bang en honger en dors die kleintjies moes gewees het – dis aaklig. Ek is net so bly hulle is ongedeerd gekry.

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.