Eerste miljoen dosisse Covid-19-entstof eersdaags in SA

(Argieffoto: Unsplash)

Die eerste 1,5 miljoen dosisse entstof teen Covid-19 is reeds aangekoop en sal vir werkers in die gesondheidsektor gebruik word, het die minister van gesondheid, dr. Zweli Mkhize, Donderdag in die parlement aangekondig.

Mkhize het aan die parlementêre portefeuljekomitee oor gesondheid gesê die Suid-Afrikaanse departement van gesondheid het reeds lankal vertroulik begin onderhandel oor verskeie entstowwe, en die eerste 1,5 miljoen dosisse is van die entstof wat in Indië ontwikkel is en reeds wyd internasionaal gebruik word.

Die eerste miljoen dosisse sal voor 31 Januarie in Suid-Afrika wees en die volgende 500 000 sal die land in Februarie bereik.

Werkers in sowel die openbare as private mediese sektor sal eerste gehelp word. Daarna sal mense ouer as 60 jaar aan die beurt kom, en dan diegene met onderliggende siektes.

Die minister het ook onthul dat onderhandelings aan die gang is met ander internasionale farmaseutiese maatskappye vir entstof om aan Suid-Afrika gelewer te word. Tans is die regering se voorkeur vir die produk van die maatskappy Johnson & Johnson, omdat dit ’n enkeldosis is (die meeste ander vereis twee afsonderlike dosisse) en goed werk.

Die Johnson & Johnson-entstof word deels deur die Suid-Afrikaanse maatskappy Aspen Pharmacare in Port Elizabeth vervaardig.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.