Eerste Omikron-gevalle se simptome betreklik ‘matig’

‘n Vrou laat doen ‘n Covid-19-toets by die OR Tambo-lughawe. (Foto: Phill Magakoe/AFP)

Dr. Angelique Coetzee, voorsitter van die Suid-Afrikaanse Mediese Vereniging (Sama), sê talle van haar pasiënte wat vermoedelik die nuwe Covid-19-variant opgedoen het, het slegs matige simptome getoon en het sonder hospitaalbehandeling van die virus herstel.

Sy sê sy het oor die afgelope 10 dae sowat 30 pasiënte behandel wat positief vir Covid-19 getoets het, maar onbekende simptome getoon het.

“Hulle geweldige moegheid het hulle na die spreekkamer gebring,” sê Coetzee.

Volgens haar is dit ongewoon vir jonger pasiënte.

Die meeste pasiënte was mans jonger as 40 en net minder as die helfte van hulle was teen Covid-19 ingeënt.

Hulle het ook effense spierpyne ondervind, ʼn krapperige keel en ʼn droë hoes gehad. Slegs enkele van haar pasiënte het ʼn effense hoër temperatuur gehad.

Dit is baie matige simptome in vergelyking met ander variante.

Coetzee het gesondheidsamptenare op 18 November ingelig oor die “kliniese prentjie wat nie by Delta pas nie” – in hierdie stadium Suid-Afrika se oorheersende variant – nadat die eerste sewe van die pasiënte ondersoek is.

Sy sê Suid-Afrikaanse wetenskaplikes het teen daardie tyd reeds die variant opgemerk – toe nog net bekend as B.1.1.529 – wat eindelik op 25 November bekend gemaak is.

Die nuus het paniek veroorsaak en het reeds tot verskeie verbodsbepalings op reisigers uit Suid-Afrikaanse lande gelei. Die regering het die stappe as “oorhaastig” en onbillik bestempel.

Coetzee sê dit is betreurenswaardig dat Omikron bestempel word as “hierdie uiters gevaarlike virusvariant” met verskeie mutasies, terwyl die virulensie daarvan nog onbekend is.

Die Wêreldgesondheidsorganisasie (WGO) het dit reeds as ʼn variant van kommer bestempel en wetenskaplikes werk hard om die gedrag daarvan te bepaal.

Die hoogs gemuteerde variant is oënskynlik erg aansteeklik en weerstandig teen immuniteit, hoewel die vermoë om entstof te ontwyk steeds ondersoek word.

“Ons sê nie daar gaan nie in die toekoms ernstige siekte wees nie,” sê Coetzee.

“Vir nou lyk dit egter of selfs die pasiënte wat nie ingeënt is nie, matige simptome het.”

Coetzee sê sy is ook betreklik seker dat talle mense in Europa boonop ook reeds die virus onder lede het.

Amptelike syfers wys sowat ʼn driekwart van die Covid-19-gevalle wat die afgelope paar dae in Suid-Afrika aangemeld is, as Omikron geïdentifiseer is.

Nadat Suid-Afrika die ontdekking van die variant bekend gemaak het, het verskeie ander lande ook die afgelope paar dae Omikron-infeksies gevind. Dit sluit in Australië, Italië, die Verenigde Koninkryk en België.

“Ons gaan ʼn toename in gevalle sien,” waarsku Coetzee.

Suid-Afrika se positiwiteitskoers staan in hierdie stadium op 9,8%.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

31 Kommentare

jongste oudste gewildste
LIEZL

Baie dankie vir hierdie eerlike berig, dr Coetzee. So dankbaar die mense herstel. Soveel leuens word aan almal vertel en dit word al weer ‘n skrikbewind.

piet

Ek het vir ‘n lang ruk so ‘n effense krapperige keel gehad en so nou en dan ‘n ligte hoesie. Ek wonder of dit nie Covid was nie. Blyk nou weg te wees maar dit was vir weke teenwoordig.

Frederick

Suid Afrika se positiwiteitskoers is tans 9.8%. Op watter basis word dit bepaal. Wat is die waarde van die statistiek. 9.8% klink baie hoog?

DJ

Goed gebalanseerde berig. Baie dankie. Daar moet gewaak word teen hierdie voortdurende vrees aanjaery. Dir hou groter gevaar in as Covid self.

ameli

My kind het die nuwe variant sy moes dringende operasie kry en as dit nie v dit was het niemand geweet sy het dit nie. Geen simptome