EFF-dreigemente by Brackenfell veroordeel

Mense raak slaags buite die Hoërskool Brackenfell in Kaapstad. (Foto: ANA)

Die DA veroordeel voortgesette dreigemente deur die EFF en inmenging deur die party by Hoërskool Brackenfell ten sterkste.

“Ná winkels aan die brand gesteek en geplunder is oor ‘aanstootlike advertensies’, en versoeke dat uitvoerende hoofde hul ondernemings volgens hul wil moet bestuur, dink die EFF nou hulle het die reg om te beheer hoe burgers privaat funksies bestuur,” het Bonginkosi Madikizela, Wes-Kaapse leier van die DA, in ʼn verklaring gesê.

Dit volg ná betogings deur die EFF buite Hoërskool Brackenfell oor ʼn privaat geleentheid wat van die skool se matrikulante gereël het – ʼn geleentheid wat nie enigiets met die skool te doen het nie. “Bykomend tot dié absurditeit, eis die EFF nou dat die skoolhoof afgedank word.”

Maroela Media het vroeër berig die EFF het Vrydag al na die Hoërskool Brackenfell opgeruk ná foto’s van matriekleerders van die skool by ʼn sogenaamde matriekafskeidgeleentheid ʼn herrie op sosiale media veroorsaak het. Net wit leerders het glo die geselligheid bygewoon.

Die betogers was Maandag weer by die skool, waar private veiligheidswagte, inwoners en ouers hulle ingewag het.

Net soos talle ander skole in Suid-Afrika moes die skool sy matriekafskeid kanselleer weens Covid-19-beperkings. “Die Wes-Kaapse departement van onderwys het soortgelyke privaat funksies aangemoedig. Dié partytjie is deur ʼn groep van 42 leerders en hul ouers gereël uit ʼn matriekklas van 254. Die partytjie het niks met die skool te doen gehad nie. Dit is ten volle gefinansier en gereël deur die betrokke ouers en leerders,” het Madikizela bygevoeg.

“Privaat geleenthede het niks te doen met enige politieke party nie. Dit is verstommend dat die EFF glo hulle kan by die skool opdaag en betoog en leerders en ouers tydens die eindeksamen (of enige ander tyd) dreig.”

Madikizela het gesê dit is betreurenswaardig dat sommige lede van die gemeenskap hierop reageer het. “Gewelddadige konfrontasies sal nie enige rasionele analise bevorder nie – dit is iets wat vandag meer nodig is as ooit in Suid-Afrika. As ons mense wil verhoed om die reg in eie hande te neem, moet die polisie hul werk doen. Dit was die werk van die polisie om die EFF se onwettige byeenkoms buite ʼn skool te voorkom en die betogers te laat verdaag.”

Vuyani Pambo, woordvoerder van die EFF, het intussen in ʼn verklaring gesê die party veroordeel die aanvalle deur “gewapende wit rassiste teen EFF-lede wat ʼn vreedsame betoging gehou het”.

Pambo het gesê daar is ook, sedert 1994, nie ʼn enkele swart onderwyser by die hoërskool aangestel nie.

“Hierdie terreur-aanvalle sal nie onbeantwoord bly nie. Die EFF sal op Brackenfell toeslaan en seker maak dat niks bedryf kan word nie. Al die wit rassiste wat ʼn onbeheersde drang het om die beweging van swart mense te bestuur, en te bepaal waar ons mag en nie mag gaan nie, sal die nederigheid geleer word soos wat ons die rassiste in Senekal geleer het,” het Pambo bygevoeg. “Hulle het ons gedruk, en nou moet hulle voorberei om harder teruggedruk te word. Die EFF sal met al sy strukture gesels oor die pad vorentoe.”

Dr. Pieter Groenewald, leier van die VF Plus, het intussen gesê die ANC-regering kyk te lank reeds anderpad terwyl die EFF en sy leierskap uit hul pad gaan om rassekonflik in Suid-Afrika te veroorsaak. “Vanoggend se gebeure by die Hoërskool Brackenfell was die jongste voorval waar gemoedere tot op ’n mespunt gedryf is.”

Groenewald het gesê dit is onaanvaarbaar en ironies dat die EFF, wat geen geheim maak van sy wrewel jeens boere, wit mense en Afrikaans nie, morele waghond probeer speel oor die Afrikaner en geweldsdreigemente gebruik as metode om sy doel te probeer bereik.

“Vanoggend se gebeure herinner aan dié van 2018 by die Hoërskool Overvaal in Vereeniging toe die EFF gewelddadige protesoptredes gehou het oor die toelating van Engelssprekende leerlinge in die skool. Die VF Plus is bly dat gemoedere vanoggend by die Hoërskool Brackenfell nie oorgekook het nie, maar sekere mense het wel handgemeen geraak en die polisie moes ingryp om die ouers en die EFF uitmekaar te hou.”

Hy meen dit is net ’n kwessie van tyd voordat hierdie soort optrede tot ’n tragedie gaan lei.

“Die VF Plus het al by herhaling in die parlement gewaarsku dat hierdie soort rasse-opstokery nie onbepaald kan voortduur nie. Dit is soos om met vuurhoutjies in droë gras te speel waaraan daar tans ’n oormaat in Suid-Afrika is juis vanweë die EFF se opruiende optrede en haatspraak, aanhitsing van geweld en intimidasie.”

Die regering sal moet ingryp voordat dit te laat is. “Die feit dat daar nie opgetree word nie, skep duidelik die indruk van stille goedkeuring aan die kant van die ANC.”

Bongiwe Mbinqo-Gigaba, voorsitter van die portefeuljekomitee oor basiese onderwys, het ook die betoging en geweld veroordeel. Sy het versoek dat kalmte by die skool sal terugkeer.

“Ek dink dit is belangrik vir alle partye om te onthou dat die graad 12’s reeds met hul eindeksamen begin het. Dit was reeds ʼn uiters uitdagende jaar vir die klas van 2020 weens die uitbreking van Covid-19 en die ontwrigting van die akademiese jaar. Hulle het nie bykomende spanning van gewelddadige betogings nodig terwyl hulle op die eksamen probeer fokus nie.”

Mbinqo-Gigaba het gesê die skool het homself reeds van die matriekpartytjie gedistansieer en gesê die geleentheid is deur ouers gereël.

“Rasse-segregasie in skole en skoolgeleenthede het nie ʼn plek in Suid-Afrika nie. Ek neem kennis van die teenstrydige berigte oor wie die geleentheid gereël het. Ek het die Wes-Kaapse departement van onderwys versoek om die saak te ondersoek.”

Indien die ondersoek bevind dat enige beamptes, insluitend onderwysers, by die geleentheid betrokke was, daarvan bewus was, of die geleentheid goedgekeur het, sal stappe teen hulle gedoen word, het sy bygevoeg. “Ek doen ʼn beroep op alle ouers en ander partye om nie die reg in eie hande te neem nie.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

56 Kommentare

jongste oudste gewildste
Susan

Die EFF moes maar eerder gaan skool bywoon het ipv dans voor die skool …….nie een van hulle is juis slim nie…….

Persheks Adri

Is dit huh? “gewapende wit rassiste teen EFF-lede wat ʼn vreedsame betoging gehou het”. Nou hoekom loop die EFF’ers nog rond en doen die polisie NIKS nie? In Senekal het ons tande gewys ons het nie gebyt nie. Julle is vlak in die dak man pffft. Ek wonder wie is die grootste rassiste en ja die regering se stilte sê baie!

Punisher

EFF en vreedsame betogings in een sin is nou voorwaar ‘n klomp snert hulle weet nie eers wat vreedsaam beteken nie

Paul

Nou kom DA minister van onderwys en hulle premier en sè ouers moet nie konflik veroorsaak verduidelik dit vir my so weer DA stem NOOIT

Sakkie

Daars hy nou word ons wakker