EFF kap Ramos se aanstelling op interim direksie

Maria Ramos. (Foto: ANA)

Die EFF is nie gelukkig oor die besluit om Maria Ramos as een van die waarnemende direksielede by die Openbare Beleggingskorporasie (OBK) aan te stel nie.

“Sy is onder verdenking en gaan nie die belange van staatsamptenare en die OBK verdedig nie,” sê die party in ʼn verklaring.

Dít volg nadat Tito Mboweni, minister van finansies, ná konsultasie met die kabinet ʼn interim direksie by die OBK aangestel het.

Dié aanstelling is effektief van 12 Julie 2019 tot 31 Julie 2020. Die voorsitter en dié se adjunk sal tydens die eerste sitting van die interim direksie aangewys word.

Ramos wat einde Januarie as uitvoerende hoof van Absa uitgetree het, is een van die waarnemende direksielede.

Daar is intussen ook aangekondig dat pres. Cyril Ramaphosa ná konsultasie met Mboweni en die direksie van die Reserwebank besluit het om Lesetka Kganyago weer as hoof van dié bank aan te stel vir nog vyf jaar.

Die EFF het in sy verklaring na Ramos asook Mboweni, die voormalige minister van finansies Trevor Manuel en pres. Cyril Ramaphosa as “direkte afgevaardigdes van wit monopolie op kapitaal” verwys.

“Ramos was onlangs ʼn raadslid van Remgro, ʼn beleggingsmaatskappy onder voorsitterskap van Johan Rupert wat aandele in baie maatskappye het wat die OBK as aandeelhouers het. Onder hierdie maatskappye val RMH en FirstRand, die eienaars van FNB en Wesbank, Mediclinic, eMedia wat eTV en eNCA besit asook Distell, RCL Foods en baie ander maatskappye waarin die OBK direkte of indirekte belange het.

“Sy sal onvermydelik in konflik wees en beslis nie die belange van staatswerknemers op die OBK-raad verdedig nie aangesien sy direkte verhoudings met die maatskappye het waarop sy as direkteur dien,” lui die verklaring.

Volgens die EFF ignoreer Mboweni doelbewus die Nasionale Vergadering se leiding ten gunste van sy kapitalistiese vriende.

Die ander lede van die OBK se interim direksie is Sindi Mabaso-Koyana, Irene Charnley, Tshepiso Moahloli, Barbara Watson, Ivan Fredericks, Zola Saphetha, Bhekithemba Gamedze, dr. Angelo David Sabelo de Bruin, prof. Bonke Dumisa, adv. Makhubalo Ndaba en dr. Reuel Khoza. Pitsi Moloto en dr. Xolani Mkhwanazi is heraangestel as direksielede.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

Het jy iets op die hart? Maroela Media se kommentaarfunksie word ongelukkig tydelik gesluit tussen 22:00 en 06:00 op Vrydagaande, Saterdae, Sondae en Maandagoggende.

Jy kan steeds op Maroela Media se Facebook-blad en ander sosiale media saamgesels. Nuuswenke kan deur hierdie vorm gestuur word.

12 Kommentare

Jaco ·

Wit monopolie kapitaal sê die kalant? Vreemd…Julias, jy het dan n luukse villa op kamsbaai gehuur teen honderde duisende nou onlangs in die Kaap wat deur n europeer besit word nogaal…die joernalis wat na die tyd deur jul vullis gegaan het getuig van uitspattige duur smaak soos die gebruik van duur Franse dranke, klere aankope van H&M, sover my kennis aangaan is jy n MASSIESWE aanhanger van wit monopoliekapitaal as dit kom by die gebruik van produkte…so hoe dan nou?

Belinda ·

Ek wag vir die dag wat EFF met enigiets gelukkig sal wees….

Gert van Wierdapark ·

Die EFf se onderrok hang ver uit want hul skaar hul mos aan die kant van SARS se gewese hoof Tom Monyane (wat dit feitlik man-alleen in die afgrond gestuur – nie bestuur het) met sy vrot planne en aan-pa-sings. Die VBS Skandaal is nog een waar groot geld betrokke was, waar die Efl lekker kleigetrap het!! Hul beskou hulself mos nie as underdogs nie, maar hulle herinner my aan Rooi-miere! Byt mos waar hul nie moet nie ens! Laastens kry hul ook heeltemal te veel gratis mediadekking danksy Julius se twakpraat!

Koos de Meyer. ·

Nee hulle wil net hulle broers daar hê sodat hulle verder ons pensioen geld kan swendel. Wie dink die mnr. is hy en sy trawante eindelik.

Joe ·

Die EFF is seker onsteld oor die R36m skeidingspakket wat Maria by Absa gekry het☺

jaco ·

wel mense, julle kan die EFF nie hierdie keer kwalik neem nie: regstellende aksie is hier om vir ewig te bly, maar n WIT vrou kry ‘n hoë pos. Dis dus vreemde regstellende aksie, of dis ‘n geval van ‘n lekker werk gee vir iemand wat deur haar ANC-man die “regte” konneksies het. Dan tel ras seker nie.
Maar die dinge het die ANC maar tog alles by “ons” geleer: ek onthou baie goed hoe dat Broederbonders in die ou SA lekker jobs gekry het en hulle was ook nie almal altyd so goed bekwaam daarvoor nie.
En vir diegene wat my nie glo nie: gaan lees maar net die artikel oor Gideon Roos op die Afrikaanse Wikipedia: weggewerk by die SAUK net omdat hy nie die regerende Nasionale Party soos n skoothondjie wou navolg nie.

jaco ·

my punt is: “hulle” het dit maar net by “ons” geleer.

Het jy iets op die hart? Maroela Media se kommentaarfunksie word ongelukkig tydelik gesluit tussen 22:00 en 06:00 op Vrydagaande, Saterdae, Sondae en Maandagoggende.

Jy kan steeds op Maroela Media se Facebook-blad en ander sosiale media saamgesels. Nuuswenke kan deur hierdie vorm gestuur word.